اندور، 6 جنوری (یواین آئی) مدھیہ پردیش کے شہر اندور میں جمعہ کو ہوئے اسکول بس حادثے میں ہلاک ہونے والے تین معصوم بچوں کو آج ان کے کنبوں سمیت پورے شہر نے پرنم آنکھوں سے الوداع کہا ۔
تین بچوں کی چیتائیں ریجنل پارک مکتی دھام پہنچیں ۔ بچوں کو ان کے آخری سفر پر لے جانے والی گاڑیوں کو پھولوں سے سجایا گیا تھا اور ان کے جنازے میں کثیر تعداد میں لوگ شریک تھے۔
اسی درمیان آج صبح سے اندور کے سبھی اسکول سوگ میں بند رہے اور شہر کے سبھی بازار بھی بند رہے۔ اندور کے خاص بازار صرافہ،کپڑا بازار، ایم جی روڈ ، کھاتی والا ٹینک کےسبھی تاجروں نے اپنی دکانیں اور ادارے بند رکھے۔
جمعہ کو کناڑا تھانہ علاقے کے مردانا بچولی بائی پاس پر دلی پبلک اسکول سے 13 بچوں کو لے کر لوٹنے والی بس سامنے سے آرہے ٹرک سے جاٹکرائی تھی جس میں شروتی لدھیانی (7)، ہرمیت کور (9)، کرتی آگروال ( 13) اور سواستک پانڈیا (13) کی موت ہوگئی تھی۔ چاروں بچے مقامی کھاتی والا ٹینک کے رہنے والے تھے۔ تینوں بچیوں کی آخری رسومات آج یہاں ادا کردی گئیں۔ اس حادثے میں بس ڈرائیور راہل کی بھی موت ہوگئی تھی۔
یواین آئی۔ ایم اے ۔ م س