RegionalPosted at: Jun 13 2018 6:18PM جے پور کے اسپتال میں آگ لگنے سے افراتفری کاماحول
جے پور، 13 جون (یو این آئی) راجستھان کی راجدھانی جے پور کے سب سے بڑے سوائی مان سنگھ اسپتال کے سرجیکل وارڈ کے پاس آج صبح آگ لگنےسے افراتفری کاماحول پیداہوگیا۔حالانکہ آگ سے کسی جانی نقصان کی کوئی خبر نہیں ہے۔
آگ لگنے سے وارڈ میں داخل مریضوں اور ان کے اہل خانہ میں افراتفری کاماحول پیداہو گیا اور کسی ناگہانی سے بچنے کیلئے مریضوں کو باہر نکالا گیا۔
اسپتال کے بانگڑ سرجیکل وارڈ کے اسٹور میں آگ لگنے کی اطلاع ملتے ہی میونسپل کی دمكلیں موقع پر پہنچی اور ایک گھنٹے کی مشقت کے بعد آگ پر قابو پالیاگیا۔ آگ پر قابو پانے کے لیے دمکل اہلکاروں کو خاصی محنت کرنی پڑی۔ آگ بجھانے کے لیے اسٹور کی کھڑکیوں میں لگے شيشو ں کو توڑنا پڑا۔
موصولہ اطلاع کے مطابق آج صبح تقریبا ساڑھے پانچ بجے ایس ایم ایس اسپتال کے سرجیکل وارڈ کے قریب بنے اسٹور سے دھواں اٹھتے دیکھا گیا جو کچھ ہی دیر میں چاروں طرف پھیل گیا۔ا سٹور سے دھواں اٹھتے دیکھ کروارڈ میں داخل مریضوں میں افراتفری کاماحول پیداہوگیا۔ اس وقت بہت سے مریض اور ان کے اہل خانہ سو رہے تھے۔
دھوئیں کی وجہ سے مچی افرا تفری کے درمیان مریضوں کے اہل خانہ مریضوں کو گود میں، کندھوں پر اور کسی طرح وارڈ سے باہر لے جاتے دیکھےگئے۔ آگ سے اسٹور میں رکھی دوائیاں اور کچھ سامان پوری طرح جل کر راکھ ہو گئے۔ آگ سے کتنا نقصان پہنچا ہے اس کا فوری پتہ نہیں چل سکا ہے۔
اسپتال سپرنٹنڈنٹ ڈی ایس مینا نے بتایا کہ آگ پر قابو پا لیا گیا ہے اور حالات معمول پر آ گئےہیں۔ انہوں نے بتایا کہ ابتدائی معلومات کے مطابق آگ شارٹ سرکٹ سے لگی ہے۔
یواین آئی۔اد۔