RegionalPosted at: Sep 12 2018 9:29PM ارشد فریدی صحافتی خدمات کے لئے اعزاز رضوی ایوارڈ سے سرفراز
پروگرام میں رکن پارلیمنٹ کلراج مشرا نے کی شرکت
لکھنؤ، 12 ستمبر (یو این آئی) اترپردیش کے سابق کابینی وزیر اعزاز رضوی کی 20 ویں برسی کے موقع پر اعزاز رضوی میموریل سوسائٹی کے ذریعہ آج یہاں ایک یادگاری جلسے کا انعقاد اترپردیش اردواکیڈمی کے آڈیٹوریم میں کیا گیا۔ پروگرام میں اعزاز رضوی کی زندگی کی کارگزاریوں اور کامیابیوں کوشائع کیا گیا۔
جلسے کی صدارت ڈاکٹر عمار رضوی (سابق نگراں وزیر، اتر پردیش) نے کی، جب کہ مہمان خصوصی کے طور پر کلراج مشرا، ایم پی (سابق مرکزی وزیر، حکومت ہند) اور مہمانان اعزازی کے طور پر سریش شریواستو (ایم ایل اے، لکھنؤ مغرب) اور عبد الرشید انصاری (قومی صدر، بھارتیہ جنتا پارٹی اقلیتی فرنٹ) موجود تھے۔
یادگاری جلسے کا آغاز قرآن مجید کی تلاوت سے ہوا۔ اس کے بعد اعزاز رضوی کی سوانح عمری پر مبنی ایک مختصر فلم دکھائی گئی، جس میں پدم شری پروفیسر ایمریٹس آصفہ زمانی کی غزل کی دھن ’ایسے بھی کیا خفا ہوئے ‘ سے ماحول غمزدہ ہو گیا۔ پروفیسر زمانی نے اپنے شوہر کو یاد کرتے ہوئے اپنے کر یئر کا کریڈٹ اپنے مرحوم شوہر اعزاز رضوی کو دیا، جن کی ہمت افزائی سے انھوں نے اعلیٰ تعلیم حاصل کی۔
اس موقع پر سوسائٹی کی طرف سے سینئر صحافی اور روزنامہ میرا وطن کے ایڈیٹر ارشد فریدی کو اردو صحافت کی خدمات کے لئے سال 2018 کے لیے اعزاز رضوی میموریل ایوارڈ سے سرفراز کیا گیا۔
غور طلب ہے کہ میرا وطن کے ایڈیٹر ارشد فریدی نے دہلی کے کئی اہم اخبارات ،روزنامہ دینک جاگرن ، روزنامہ راشٹریہ سہارا اور روزنامہ امر اجالا میں لمبے وقت تک اپنی صحافتی خدمات انجام دی ہیں ۔
یو این آئی۔ سلام۔م الف