علی گڑھ، 21اکتوبر(یو این آئی)مولانا آزاد کیڈمی نئی دہلی کی طرف سے شائع کردہ دستاویزی کتاب ’’مولانا ابوالکلام آزاد :ایک تجزیاتی مطالعہ‘‘ کا اجراء یہاں ایک تقریب میں عمل میں آیا۔ا س کتاب کے مرتب مشہور عالم دین مولانا مفتی عطاء الرحمن قاسمی ہیں جو اکیڈمی کے جنرل سکریٹری ہیں۔
اس موقع پر کتاب کا اجرا کرتے ہوئے ماہر ابوالکلامیات پروفیسر ریاض الرحمن خاں شیروانی نے کہا کہ مولانا مفتی عطاء الرحمن قاسمی کا شکر گزار ہوں کہ انھوں نے اس کتاب کے اجراء کے لئے بطور خاص علی گڑھ کا سفر کیا۔
پروفیسر ریاض الرحمن خاں شیروانی نے اس اہم کتاب میں، مولانا ابوالکلام آزاد غلط فہمیاں اور حقائق ،کے عنوان سے ایک معرکتہ الاراء مقدمہ تحریر کیاہے،جس میں کہا گیاہے کہ ،مولانا آزادکے بارے میں جتنی غلط فہمیاں پھیلائی گئیں، شاید ہی کسی دوسرے شخص کے بارے میں پھیلائی گئی ہوں اور یہ غلط فہمیاں انکی زندگی کے مختلف النوع حالات و و اقعات سے تعلق رکھتی ہیں ۔چنانچہ کہا گیا کہ انھوں نے جامعہ ازہر میں تعلیم حاصل کی ،جو سراسر غلط ہے ،کسی طرح یہ بھی مشہور ہوگیا کہ ان کی پیدائش ۱۱ نومبر کی ہے ،اور سرکاری طور پر یہی تاریخ تسلیم کرلی گئی ہے حالانکہ کہ وہ اگست کے آخری عشر میں تولد ہوئے تھے ۔
واضح رہے کہ اس کتاب کی رسم اجرا ء حبیب منزل علیگڑھ میں عمل میں آئی ، حبیب منزل وہ تاریخی رہائش گاہے ،جس میں غبارخاطر کے مکتوب نگار مولانا آزاد اپنے مکتوب الیہ نواب صدر یا جنگ مولانا حبیب الرحمن خاں شیروانی کے ساتھ اپنی دیرینہ رفاقت کی وجہ سے علیگڑھ کے سفر کے دوران، ٹھہرا کرتے تھے ، جہاں آج بھی مولانا آزاد کی بہت ساری یادیں اور یادگاریں موجود ہیں ۔
اس کتاب کی تقریب رونمائی میں پروفیسر مسعود انور علوی ،پروفیسر ظفرالا سلام اصلاحی، ڈاکٹر ظفر علی خاں ، پروفیسر اصفر علی خاں، ڈاکٹر مدیح الرحمن خاں شیروانی اور ڈاکٹر سلطان احمد نے بھی اپنے وقیع خیالات و تاثرات کا اظہار کیا۔
پروفیسر شیروانی کے صاحب زادے ڈاکٹر مدیح الرحمن خاں شیروانی ، نے اس ادبی تقریب کے انعقاد میں غیر معمولی دلچسپی لی ہے اور مہمانوں کی ضیافت کی ۔
یو این آئی۔ ایم اے۔م الف