RegionalPosted at: Feb 21 2018 10:09PM کناڈاکسی علیحدگی پسند تحریک کی حمایت نہیں کرتا:جسٹن ٹروڈیو
امرتسر، 21 فروری (یو این آئی) کناڈا کے وزیر اعظم جسٹن ٹروڈیو نے آج پنجاب کے وزیر اعلی کیپٹن امریندر سنگھ کو یقین دلایا کہ ان کا ملک ہندوستان یا کہیں بھی کسی علیحدگی پسند تحریک کی حمایت نہیں کرتا۔
کیپٹن امریندر سنگھ کی طرف سے علیحدگی پسندی پر قابو پانے کے لئے کناڈا کے وزیر اعظم سے تعاون کی درخواست کئے جانے پر مسٹر ٹروڈیو نے انہیں یہ یقین دہانی کرائی۔ کیوبک میں علیحدگی پسند تحریک کا ذکر کرتے ہوئے مسٹر ٹروڈیو نے کہا کہ انہوں نے اس طرح کے خطرات سے نمٹنے میں اپنی ساری زندگی گزار دی ہے اور انتہا پسندی کے خطرات سے وہ پوری طرح واقف ہیں۔
دونوں رہنماؤں کے درمیان تقریبا 40 منٹ تک چلنے والی ملاقات میں پنجاب کے وزیر اعلی نے مسٹر ٹروڈیو کو 'اے' زمرہ کے نو لوگوں کی فہرست سونپی ہے، جو کناڈا میں بیٹھ کر پنجاب میں نفرت پھیلانے اور مجرموں کو ہتھیار فراہم کرنے کے علاوہ دہشت گردانہ سرگرمیاں چلانے میں مدد کر رہے ہیں اور یہاں نوجوانوں اور بچوں كوبنیاد پرست بنانے کی کوشش میں مصروف ہیں۔
یو این آئی ۔م ش ۔ 2040