نئی دہلی، 25 مارچ (یو این آئی) کانگریس نے کرناٹک اسمبلی کے اس سال ہونے والے انتخابات کے لئے ہفتہ کو 124 امیدواروں کی پہلی فہرست جاری کی۔ پارٹی نے کرناٹک کے سابق وزیر اعلیٰ سدارامیا کو ورونا اسمبلی سیٹ سے اور ریاستی کانگریس صدر ڈی کے شیوکمار کو کنکا پورہ سیٹ سے میدان میں اتارا ہے۔
اس سے پہلی فہرست میں مسٹر سدارامیا نے کولار سے انتخاب لڑنے کی خواہش کا اظہار کیا تھا، لیکن ضلع کے مقامی پارٹی لیڈروں کے ذریعے سابق وزیر اعلی کی امیدواری پر اختلاف کے بعد کانگریس ہائی کمان نے انہیں ورونا سے الیکشن لڑنے کا فیصلہ کیا ہے۔
کولار گولڈ فیلڈ سیٹ سے ایم روپکلا ا میدوار ہوں گے۔ دو سابق وزراء جی پرمیشور اور کے ایچ منیاپا کو بالترتیب کوراٹگیرے (درج فہرست ذات) اور دیوناہلی حلقوں سے میدان میں اتارا جا رہا ہے۔
کانگریس کے قومی صدر ملکارجن کھڑگے کے بیٹے پرینک کھڑگے کو ان کی پرانی سیٹ چتاپور (ریزرو) سے ٹکٹ دیا گیا ہے۔ وہ حال میں اسی سیٹ کی نمائندگی کر رہے ہیں۔
پارٹی کی مرکزی الیکشن کمیٹی نے 17 مارچ کو دہلی میں ہونے والی میٹنگ کے بعد امیدواروں کی پہلی فہرست کو منظوری دے دی ہے۔ یہ میٹنگ مسٹر کھڑگے کی صدارت میں ہوئی تھی اور اس میں سابق صدر راہل گاندھی بھی شامل ہوئے۔
کرناٹک میں موجودہ اسمبلی کا دور مئی میں ختم ہو رہاہے۔ الیکشن کمیشن نے ابھی تک ریاست میں اسمبلی انتخابات کے شیڈول کا اعلان نہیں کیا ہے۔
یو این آئی۔ خ س۔