NationalPosted at: Mar 17 2018 5:07PM ایک ساتھ الیکشن منعقد کرانا غیرقابل عمل، بیلٹ پیپر سے انتخابات ہوں: کانگریس
نئی دہلی، 16 مارچ (یو این آئی) کانگریس نے لوک سبھا اور اسمبلی انتخابات ایک ساتھ منعقد کرانے کی مودی حکومت کی تجویز کو پوری طرح سے مسترد کر دیا ہے اور انتخابات الیکٹرانک ووٹنگ مشین کی بجائے بیلٹ پیپر سے کرانے کا مطالبہ کیا ہے۔
پارٹی کے یہاں 84 ویں عمومی اجلاس میں لوک سبھا اور اسمبلی انتخابات ساتھ منعقد کرانے کی حکومت کی تجویز کو آئین کے نقطہ نظر سے غیر مناسب اور غیر قابل عمل قرار دیا گیا۔سیاسی قرارداد میں کہا گیا ’’ایک ساتھ الیکشن کرانے کی بی جے پی کی چال غلط ہے۔ یہ آئین کے نقطہ نظر سے غیر مناسب ہے اور قابل عمل بھی نہیں ہے۔ اس کے سنگین نتائج ہوں گے، جن کی مکمل طور پر جانچ کی جانی چاہئے اور اس پر قومی پیمانہ پر اتفاق ہونا چاہئے۔
پارٹی نے الیکٹرانک ووٹنگ مشين کے سلسلہ میں سیاسی جماعتوں اور عام لوگوں کے ذہنوں میں ہونے والے خدشات کا ذکر کرتے ہوئے الیکشن کمیشن سے انتخابات کو بیلٹ پیپرسے کرانے کے پرانےطریقہ کو اپنانے کی اپیل کی ہے۔ سیاسی قرارداد میں کہا گیا ’’الیکشن کمیشن کے پاس آزادانہ اور منصفانہ انتخابات کو یقینی کرانے کی آئینی ذمہ داری ہوتی ہے۔ انتخابی نظام میں لوگوں کا بھروسہ برقرار رکھنے کیلئے ووٹنگ اور ووٹوں کی گنتی کاعمل شفاف ہونا چاہئے۔ نتائج میں دھاندلی کرنے کے لئے ای وی ایم کے غلط استعمال کے معاملہ میں سیاسی جماعتوں اور عام لوگوں کے ذہنوں میں کافی خدشات ہیں۔ الیکشن نظام میں اعتبار کو یقینی بنانے کے لیے الیکشن کمیشن کو بیلٹ کے پرانے طریقے کو دوبارہ نافذ کرنا چاہئے، کیونکہ زیادہ تر اہم جمہوریتوں نے ایسا ہی کیا ہے۔
یو این آئی- ص ا