نئی دہلی، 11 نومبر ( یواین آئی) کانگریس نے وزیر خزانہ نرملا سیتا رمن کے ہندوستانی معیشت کے چیلنج کے دور سے گزرنے کی بات کا اعترا ف کرنے پر خوشی ظاہر کرتے ہوئے پیر کے روز طنز کیا کہ کاش یہی بات ملک میں ’سب کچھ ٹھیک ہے‘ کہنے والے وزیر اعظم نریندر مودی کو کوئی سمجھا پاتا ۔ کانگریس نے کہا کہ وزیر خزانہ کا یہ بیان دیکھ کر اسے اچھا لگا کہ معیشت کے تعلق سے ملک کے جو حالات ہیں حکومت کی توجہ اس حقیقت کی طرف مبذول ہوئی ہے ۔ کانگریس نے اپنے آفیشیل ٹوئٹر ہینڈل پر آگے کہا’’اب کوئی یہی بات وزیر اعظم کو سمجھا پائے تو شاید وہ آنے والے دنوں میں یہ کہتے ہوئے ملک کے شہریوں کو مایوس نہیں کریں گے کہ ’ سب چنگی سی ‘ کا دعوی کر کے ملک کے باشندوں کو مایوس کرنا بند کر دیں‘‘ ۔ اس کے ساتھ ہی پارٹی نے ایک خبر بھی پوسٹ کی ہے جس میں محترمہ سیتا رمن کہہ رہی ہیں کہ ہندوستانی معیشت چیلنج کے دور سے گزر رہی ہے اور اقتصادی ترقی کی شرح چھ سال کے نچلے سطح پر پہنچ گئی ہے۔ واضح رہے کہ مسٹر مودی نے گزشتہ ستمبر میں امریکہ کے ہیوسٹن میں ’ ہاؤ ڈی مودی‘ پروگرام کے دوران ہندوستانی نژاد امریکیوں سے خطاب کرتے ہوئے کہا تھا کہ اگر کوئی ان سے پوچھے گا کہ ’ ہاؤ ڈی مودی ‘ تو میرا جواب ہے کہ ہندوستان میں سب کچھ اچھا ہے۔ کانگریس جنرل سکریٹری پرینکا گاندھی واڈرا نے بھی کچھ دن قبل مسٹر مودی کے ’سب کچھ ٹھیک ہے‘ بیان پر طنز کرتے ہوئے کہا تھا کہ بیرون ملک جاکر یہ دعوی کرنا ٹھیک نہیں ہے کہ ’ سب چنگی سی ‘ یعنی سب کچھ ٹھیک ہے، کہنے سے سب ٹھیک تو نہیں ہو جائے گا ۔
یواین آئی ۔ ک ج