نئی دہلی، 15 اپریل (یو این آئي) کانگریس نے بھارتیہ جنتا پارٹی (بی جے پی) کےا سٹار کمپینراور اترپردیش کے وزیر اعلی یوگی آدتیہ ناتھ پر 72 گھنٹے کے لئے انتخابی مہم میں شرکت نہ کرنے کی پابندی لگانے پر الیکشن کمیشن کی تعریف کرتے ہوئے کہا ہے کہ اس سے معاشرے میں نفرت اور وحشت پھیلانے پر روک لگے گی۔
کانگریس کے ترجمان ابھیشیک منو سنگھوی نے پیر کے روز یہاں پارٹی ہیڈکوارٹر میں ایک پریس کانفرنس میں کہا کہ الیکشن کمیشن نے مسٹر آدتیہ ناتھ کے خلاف یہ پابندی کانگریس کی شکایت پر لگائی ہے۔ کانگریس اس کی تعریف کرتی ہے اور امید کرتی ہے کہ اس سے معاشرے میں نفرت اور وحشت پھیلانے والی تقریروں پر روک لگے گی۔
الیکشن کمیشن نے انتخابی مہم کے دوران بہوجن سماج پارٹی کی سپریمو مایاوتی اور مسٹر آدتیہ ناتھ کی تقریروں کو مثالی ضابطہ اخلاق کی خلاف ورزی قرار دیا ہے اور ان پر بالترتیب 48 گھنٹے اور 72 گھنٹے تک انتخابی مہم پر روک لگا دی ہے۔ یہ پابندی کل سے نافذ ہو گی۔
مسٹر سنگھوی نے کہا کہ الیکشن کمیشن نے اچھی شروعات کی ہے اور امید کرتے ہیں کہ کانگریس کی باقی شکایات پر بھی فوری طور پر کارروائی ہوگی۔
کانگریس کے میڈیا انچارج رنديپ سنگھ سورجےوالا نے ایک ٹویٹ کیا کہ کیا الیکشن کمیشن وزیر اعظم نریندر مودی کے خلاف بھی کارروائی کرے گا؟۔ انهوں نے کہاکہ "الیکشن کمیشن نے پاز بٹن دبا دیا ہے اور نفرت پھیلانے والے پروپیگنڈے پر روک لگے گی۔
یو این آئي ۔م ش ۔ 1930