نئی دہلی، 13 جولائی (یواین آئی) کورونا وائرس (کووڈ19 ) کے علاج سے مرکز اور ریاستی حکومتوں کی مشترکہ کوششوں سے ملک میں کورونا سے ٹھیک ہونے والوں کی شرح بڑھ کر 63.02 ہوگئی ہے۔ ملک کے 19 ریاستوں میں کورونا سے ٹھیک ہونے والوں کی شرح قومی اوسط سےزیادہ ہے۔
وزارت صحت و خاندانی فلاح وبہبود نے آج بتایا کہ پورے ملک میں چوبیس گھنٹوں کے دوران 18,850 مریض کورونا انفیکشن سے پوری طرح سے ٹھیک ہوچکے ہیں۔ اس طرح کورونا وائرس سے اب تک 5,53,470 لوگ ٹھیک ہوچکےہیں۔
ملک میں اس وقت کورونا کے 3,01,609 سرگرم معاملے ہیں، جن کا علاج اسپتالوں، کووڈ کیئر سینٹروں یا ہوم آئسولیشن میں ہورہا ہے۔ کورونا انفیکشن کے سرگرم معاملوں کے مقابلے میں کورونا سے ٹھیک ہونے والے مریضوں کی تعداد کے درمیان 2,51,861 کا فرق ہے۔
گزشتہ دو دنوں سے کورونا کے انفیکشن کے 28,000 سے زیادہ نئے معاملے سامنے آرہے ہیں جس سے اب تک مجموعی طور سے متاثر مریضوں کی تعدادبڑھ کر 8,88,948 ہوگئی ہے۔
جن انیس ریاستوں میں کورونا سے ٹھیک ہونے والوں کی قومی اوسط سے زیادہ ہے ان میں لداخ پہلے مقام پر ہے۔ لداخ میں کورونا سے ٹھیک ہونے والوں کی شرح 85.45 فیصد، دہلی میں 79.98 فیصد، اتراکھنڈ میں 78.77 فیصد، چھتیس گڑھ میں 77.68 فیصد، ہماچل پردیش میں 76.59فیصد، ہریانہ میں 75.25فیصد، چنڈی گڑھ میں 74.60فیصد، مدھیہ پردیش میں 73.03فیصد، گجرات میں 69.73 فیصد، تریپورہ میں 69.18 فیصد، بہار میں 69.09 فیصد، پنجاب میں 68.94 فیصد، اڈیشہ میں 66.69فیصد، میزورم میں 64.94 فیصد، آسام میں 64.87فیصد، تلنگانہ میں 64.66 اور تمل ناڈو میں 64.84 فیصد، اترپردیش میٰں 63.97 فیصد ہے۔
یواین آئی۔ ظ ا