نئی دہلی، 18 اگست (یو این آئی) جنوبی دہلی کے سنگم وہار علاقے میں خوف و ہراس پھیلانے والی 'لیڈی ڈان' بشيرن عرف ممی (62) کو پولس نے گرفتار کیا ہے۔
جنوبی دہلی کے پولس ڈپٹی کمشنر رومل بنيا نے آج بتایا کہ بشيرن گزشتہ آٹھ ماہ سے فرار تھی۔ اس کے آٹھ بیٹے ہیں اور سب جرائم میں اس کا ساتھ دیتے تھے۔ پورے خاندان پر لوٹ ، چوری، سپاری لے کر قتل کرنے سمیت جرائم کے تقریبا 113 معاملے درج ہیں۔ سنگم وہار میں سرکاری بورویل پر اس کا قبضہ ہے اور لوگوں کے گھروں تک پانی پہنچانے کے لیے ہر مہینے موٹی رقم وصول کرتی ہے۔
انہوں نے بتایا کہ پولس کو 17 اگست کو خفیہ اطلاع ملی تھی کہ بشيرن سنگم وہار میں اپنے خاندان سے ملنے کو آنے والی ہے۔ معلومات کی بنیاد پر پولس نے جال بچھا کر اس کو جمعہ کی دیر رات تقریبا بارہ بجے گرفتار کر لیا۔
سنگم وہار کے جنگل میں گزشتہ دسمبر میں ایک نوجوان کا جزوی طور پر کٹی ہوئی لاش ملی تھی۔ مقتول کی شناخت میراج کے طور پر ہوئی تھی جو اترپردیش کا باشندہ تھا۔ اس معاملے میں پولس نے اس سال جنوری میں ایک نابالغ کو پکڑا تھا جس نے بتایا تھا کہ اس نے آکاش عرف آكي، وکاس عرف ویکی ، نیرج عرف جگی، منی بیگم اور بشيرن کے ساتھ مل کر میراج کو قتل کیا تھا۔
مسٹر بنيا نے بتایا کہ تفتیش میں بشيرن نے اعتراف کیا کہ ساٹھ ہزار روپے لے کر اس نے میراج کا قتل کیا تھا اور اس کام کو آکاش اور وکاس نے انجام دیا تھا۔
انہوں نے کہا کہ بشيرن نے اپنے آٹھ بیٹوں کو بھی جرائم کی دنیا میں دھکیل رکھا ہے۔ بشيرن کے خلاف 9 معاملے درج ہیں۔
یو این آئی ۔م ش ۔ 1845