NationalPosted at: Jul 10 2020 5:30PM دانش نے سبحان کی تلاش کے لئے راج ناتھ کو لکھا مکتوب
نئی دہلی ، 10 جولائی ( یواین آئی ) بہوجن سماج پارٹی کے لیڈر اور رکن پارلیمان کنور دانش علی نے جمعہ کے روز وزیر دفاع راج ناتھ سنگھ کو ایک مکتوب ارسال کر کے لہیہ میں تعینات انڈین انجینئرنگ سروس (آئی ای ایس) کے افسر سبحان علی کی تلاش میں تیزی لائی جانے اور اس میں ذاتی مداخلت کی درخواست کی۔
مسٹر علی کی طرف سے وزیر دفاع کو ارسال کئے گئے مکتوب میں یہ کہا کہ ایک بہادر آئی ای ایس افسر سبحان علی کی گاڑی لداخ میں دراس ندی میں گر گئی تھی ، جس کے بعد سے ان کی کوئی خبر نہیں ہے۔ اس سے قبل انہوں نے وزیر دفاع کو ٹیلی فون کے ذریعہ بھی اس تعلق سے اطلاع دی تھی ۔
انہوں نے کہا کہ اترپردیش کے بلرام پور سے تعلق رکھنے والا 27 سالہ سبحان علی 22 جون کو میرامار میں قرنطینہ مرکز کا جائزہ لینے گیا تھا۔ وہ روزانہ اپنے گھر والوں سے فون پر بات کرتا تھا۔ جب 22 جون کی رات کو سبحان علی کا فون نہیں آیا تو اس سے اہل خانہ کے افراد نے ان سے رابطہ کیا ، جس پر پتہ چلا کہ سبحان علی کا فون بند آرہا ہے۔
اس کے بعد اہل خانہ نے کمانڈنگ آفیسر سے بات کی لیکن کوئی تسلی بخش جواب نہیں ملا۔ ان کے گھروالوں کو 23 جون کو یہ خبر ملی کہ جپسی میں سبحان علی سوارتھے ، وہ گہری کھائی میں گر گئی اوردراس ندی کے تیز بہاؤ میں بہہ گئی۔
چار دن بعد 26 جون کو جپسی کو ندی سے نکالا گیا ، لیکن آئی ای ایس افسر سبحان اور اس کے ڈرائیور پلوندر سنگھ کا کوئی سراغ نہیں ملا۔امروہہ کے رکن پارلیمنٹ نے کہا کہ بارڈر روڈ آرگنائزیشن اور کارگل انتظامیہ سبحان علی کی تلاش کے لئے مستقل کوشش کر رہی ہے لیکن محدود وسائل سے وہ لاپتہ افسر کو تلاش کرنے میں کامیاب نہیں ہو پا رہے ہیں ۔ انہوں نے وزیر دفاع سے کہا ’’میں آپ سے اپیل کرتا ہوں کہ وہ اس معاملے میں ذاتی طور پر مداخلت کریں اور قابل افسران اور وسائل کو سبحان علی کو تلاش میں لگائیں ۔ لاپتہ افسرکے اہل خانہ کے افراد پریشان کن حالت میں ہے اور وہ ہر لمحہ ایک خوفناک تکلیف سے گزر رہے ہیں‘‘ ۔ لوک سبھا رکن پارلیمنٹ نے اس سلسے میں وزیر دفاع کو فون کیا جس پر انہوں نے یقین دہائی کرائی کہ سبحان علی کی تلاش کے لئے سرکاری مشینری سے ہر ممکن کوشش کی جائے گی۔
یواین آئی ۔ ک ج