RegionalPosted at: Jan 25 2020 12:14PM پٹھان کا نقوی سے اجمیر درگاه کیلئے پانچ کروڑ روپے کا مطالبہ
اجمیر، 25 جنوری (یواین آئی) راجستھان کے اجمیر میں واقع خواجہ صاحب کی درگاہ کا انتظام سنبھالنے والی درگاہ کمیٹی کے صدر امین پٹھان نے مرکزی اقلیتی امور کے وزیر مختار عباس نقوی سے درگاہ میں بنیادی سہولیات اور انتظامات کے لئے پانچ کروڑ روپے کا مطالبہ کیا ہے ۔
پٹھان نے آج بتایا کہ انہوں نے کل نقوی سے ملاقات کر کے خواجہ صاحب کے 808 ویں سالانہ عرس میں تشریف لانے کے لئے انہیں دعوت دی اور ان سے کہا کہ عرس کیلئے نہ تو درگاہ کمیٹی کے پاس بجٹ ہے اور نہ ہی ریاستی حکومت بجٹ مہیا کراتی ہے ۔ ایسے میں درگاہ کمیٹی کو لاکھوں زائرین کیلئے انتظامات کرنے میں دقتیں آتی ہیں۔ پٹھان نے مذکورہ باتوں سے متعلق وزیر نقوی کو خط بھی پیش کیا۔
انہوں نے بتایا کہ نقوی نے ان کی بات کو سنجیدگی سے لیتے ہوئے ہاتھوں ہاتھ وزیر خزانہ نرملا سیتا رمن سے ٹیلی فون پر بات کرکے درگاہ کیلئے بجٹ مختص کرنے کی بات کہی۔ وزیر خزانہ سیتا رمن نے بھروسہ دلایا کہ درگاہ کے لیے مستقل بنیادی ڈھانچہ تیار کرنے کے لئے خصوصی بجٹ جاری کیا جائے گا۔ مسٹر پٹھان نے امید ظاہر کی کہ یہ بجٹ رقم اسی عرس میں دستیاب ہو جائے گی۔
خیال رہے غریب نواز کا سالانہ عرس فروری میں 19 یا 20 فروری کو جھنڈے کی رسم کے ساتھ ساتھ غیر رسمی طور پر شروع ہو جائے گا۔
یواین آئی،اظ