NationalPosted at: Nov 27 2020 10:05PM ہندوستان اور ویتنام نے آبی سروے کے میدان میں تعاون کا معاہدہ کیا
نئی دہلی ,27 نومبر (یواین آئی) ہندوستان اور ویتنام نے دوطرفہ تعلقات کو مستحکم کرنے کی سمت میں ایک اہم اقدام کرتے ہوئے آج آبی سروے کے میدان میں تعاون بڑھانے سے متعلق نظام نافذ کرنے والے دستاویزات پر دستخط کیے وزیر دفاع راجناتھ سنگھ اور ویتنام کے وزیر دفاع جنرل شیان لچ نے آج ویڈیو کانفرنس کے ذریعے دو طرفہ بات چیت کی جس کے بعد ان دستاویزات پر دستخط کیے گئے۔ یہ معاہدہ دونوں ممالک کے آبی سروے دفاتر کے مابین ہوا ہے۔ اس سسٹم سے دونوں ممالک آبی سروے سے متعلق اعداد و شمار شیئر کریں گے اور شپنگ چارٹ بنانے میں ایک دوسرے کے ساتھ تعاون کریں گے۔
وزیر دفاع راج ناتھ سنگھ نے اپنے ویتنامی ہم منصب سےاپیل کی کہ دونوں ممالک کی دفاعی صنعتوں کو قریبی تعاون کے لئے ادارہ جاتی فریم ورک معاہدے کو حتمی شکل دینا چاہئے۔ انہوں نے ’ خود کفیل ہندوستان ‘ اسکیم کا ذکر کرتے ہوئے کہا کہ ایک مضبوط اور خود کفیل ہندوستان ویتنام جیسے دوست ملک کی صلاحیت کی تعمیر میں مددکرے گا۔
بات چیت کے دوران ، دونوں رہنماؤں نے دفاعی تعاون سے وابستگی کا اعادہ کیا اور کہا کہ یہ ان کے مابین مجموعی اسٹریٹجک شراکت داری کا ایک مضبوط ستون ہے۔ انہوں نے مختلف موجودہ منصوبوں اور مستقبل کے دوطرفہ دفاعی معاہدوں پر تبادلہ خیال کیا۔ انہوں نے اس بات پر بھی اطمینان کا اظہار کیا کہ کووڈ وبا کے باوجوددونوں ممالک کی مسلح افواج میں مثبت ہم آہنگی بنی ہوئی ہے۔ وزرائے دفاع نے دفاعی صنعت کی استعداد کار کی تعمیر ، تربیت اور اقوام متحدہ کے امن فورس کی سطح پر تعاون بڑھانے پر بھی بات کی۔
ویتنام کے وزیر دفاع نے مسٹر سنگھ کو ویتنام کے ذریعہ ورچوئل ذرائع سے آئندہ 10 دسمبر کو منعقد کی جانے والی اے ڈی ایم ایم پلس کی میٹنگ میں شرکت کی بھی دعوت دی۔
یواین آئی۔الف الف