نئی دہلی، 03 دسمبر (یو این آئی) قومی راجدھانی دہلی میں کورونا وائرس ’کووِڈ۔19‘ کی وبا دن بہ دن بڑھتی جا رہی ہے لیکن راحت کی بات یہ ہے کہ گذشتہ آٹھ دنوں میں کورونا کے فعال کسیز میں مسلسل کمی آئی ہے۔ جمعہ کے روز گذشتہ گھنٹوں میں نئے فعال کیسز 868 کم ہو کر 28252 رہ گئے۔
دارالحکومت 27 نومبر سے آج تک فعال کیسز میں کمی آئی ہے۔ گذشتہ 27 نومبر کو دارالحکومت میں فعال کیسز کی تعداد 38,181 تھی جس کے بعد فعال کیسز میں مسلسل کمی آئی ہے۔ نئے کیسز کے مقابلے صحتیاب ہونے والوں کی تعداد زیادہ ہونے سے فعال کیسز میں کمی آنا بڑی راحت کی بات سمجھی جا رہی ہے۔
دہلی کے محکمہ صحت کی جانب سے آج جاری بلیٹن کے مطابق دہلی میں اس دوران 4067 نئے کیسز کے سامنے آنے کے بعد متاثرین کی کل تعداد 5,86,125 ہو گئی جبکہ 4,862 مریضوں کے صحتیاب ہونے سے فعال کیسز میں کمی آئی ہے اور کورونا سے نجات پانے والوں کی تعداد 5,48,376 ہو گئی ہے۔ کورونا ریکوری شرح 93.56 فیصد ہوگئی ہے۔ اس دوران 73 مریضوں کی موت ہونے سے ہلاکتوں کے اعداد و شمار 9497 ہو گئے ہیں جو کافی تشویشناک ہے۔ دارالحکومت میں شرح اموات محض 1.61 فیصد ہو گئی ہے۔ ہلاکتوں کے معاملے میں دہلی ملک میں چوتھے نمبر پر ہے۔
دارالحکومت میں گذشتہ 24 گھنٹوں میں 85,003 سیمپل کا ٹیسٹ کیا گیا۔ اسی کے ساتھ اب تک ہوئے ٹیسٹ کی تعداد بڑھ کر 65,85,703 لاکھ ہو گئی ہے۔ فی 10 لاکھ پر ٹیسٹ کا اوسط 3,46,615 ہے۔ دہلی میں کنٹینمنٹ زون کی تعداد میں مسلسل اضافہ ہو رہا ہے اور یہ تعداد 5909 ہو گئی ہے۔
یو این آئی،ایم اے۔