نئی دہلی، 21 فروری (یو این آئی) سکم سیکٹر میں چین اور بھوٹان سے متصل ٹرائجكشن میں واقع ڈوكلام میں چین کی بڑھتی ہوئی سرگرمیوں کے درمیان فوجی سربراہ جنرل بپن راوت نے آج کہا کہ وہاں سب ٹھیک ہے اور کسی طرح کی فکرمندی کی بات نہیں ہے۔
جنرل راوت نے شمال مشرقی خطہ خاص طور پر سلی گوڑی میں دفاعی پہلوؤں پر آج یہاں منعقدہ ایک سیمینار کے دوران الگ سے نامہ نگاروں کے سوالات کے جواب میں کہا کہ "سب ٹھیک ہے اور تشویش کی کوئی بات نہیں ہے"۔
اس سے پہلے اسی پروگرام میں بحریہ کے سربراہ ایڈمرل سنیل لامبا نے کہا کہ چین کی طرف سے حقیقی کنٹرول لائن کی بار بار خلاف ورزی اور ڈوكلام میں اس کی سرگرمیاں تشویشناک ہیں۔ انہوں نے کہا کہ "چینی فوجیوں کی طرف سے حقیقی کنٹرول لائن کو بار بار تجاوز کرنے اور ڈوكلام میں فوجی تعطل سے چین کے غلبہ حاصل کرنے کے اشارے ملتے ہیں۔ چین اس علاقے میں فوجی اور بنیادی ڈھانچے میں اضافہ بھی کر رہا ہے"۔
جنرل راوت نے سمینار کے ایک سیشن کے اختتامی بیان میں کہا کہ سلی گوڑی کوریڈور پر ہندوستان کو اپنی آنکھ اور کان کھلے رکھنے کی ضرورت ہے۔ انہوں نے کہا کہ ہمارا مغربی پڑوسی (پاکستان) خفیہ وار کرتے ہوئے منصوبہ بند طریقے سے بنگلہ دیش کے راستے یہاں لوگوں کو بھیج رہا ہے اور ہمارا شمالی پڑوسی (چین) اس میں تعاون کر رہا ہے۔ اس کے پیچھے ان کا مقصد اس علاقے میں بدامنی پیدا کرنا ہے۔
یو این آئی ۔ م ش ۔ 2155