نئی دہلی 07 دسمبر (یواین آئی) مرکزی وزیر اشونی ویشنو نے آج دعویٰ کیا کہ ہندوستان کی معیشت ایک تاریخی موڑ پر پہنچ گئی ہے جہاں مینوفیکچرنگ سیکٹر نے ایکسپورٹ مارکیٹ میں سروس سیکٹر کو پیچھے چھوڑ دیا ہے اور ہندوستان کی برآمدات جلد ہی ایک ٹریلین ڈالر کو چھو جائیں گی۔ انہوں نے یہ بھی دعویٰ کیا کہ آج ہندوستان ہر سال 1 کروڑ 80 لاکھ نئے روزگار کے مواقع پیدا کر رہا ہے۔
مسٹر وشنو نے یہاں ایک پریس کانفرنس میں یہ اطلاعات شیئر کیں۔
مسٹر ویشنو نے کہا کہ ملک کی معیشت ایک تاریخی موڑ پر پہنچ گئی ہے۔ ملک میں مینوفیکچرنگ سیکٹر کو فروغ دینے کی بات کافی عرصے سے ہو رہی تھی لیکن ایسا نہ ہو سکا۔ پچھلے 40 سے 50 سالوں کے دوران ہندوستان میں مینوفیکچرنگ مسلسل گرتی رہی اور ہم اس کی صلاحیت سے فائدہ نہیں اٹھا سکے۔
انہوں نے کہا کہ کانگریس لیڈر وزیر اعظم نریندر مودی کے میک ان انڈیا کے نعرے کا مذاق اڑاتے تھے اور آج حالات خود ان کا مذاق اڑانے لگے ہیں۔
انہوں نے کہا کہ آج ہم ایسی صورتحال پر پہنچ چکے ہیں جب ہماری برآمدات ایک ٹریلین ڈالر تک پہنچنے والی ہیں اور جلد ہی ہم اس سطح کو عبور کر لیں گے۔
انہوں نے کہا کہ مالی سال 2022-23 میں ہندوستانی برآمدات 7.62 کھرب ڈالر سے زیادہ تھیں۔ اس میں سے مینوفیکچرنگ کی برآمدات 4.53 ٹریلین ڈالر اور سروس سیکٹر کی برآمدات 3.09 کھرب ڈالر رہیں۔
انہوں نے بتایا کہ پہلے ہم صرف تین چار اشیاء برآمد کرتے تھے۔ اب برآمدی اشیاء کی فہرست بھی طویل ہوتی جا رہی ہے۔ گزشتہ سال سب سے زیادہ برآمدات 97 ارب ڈالر مالیت کی پیٹرولیم مصنوعات، 19 ارب ڈالر کی ادویہ سازی، 12 ارب ڈالر کی ٹیلی کام آلات، 11 ارب ڈالر کی الیکٹریکل مشینری، 8 ارب ڈالر مالیت کی ایلومینیم مصنوعات، 8.7 ارب ڈالر مالیت کی موٹر گاڑیاں اور کاریں اور الیکٹرانکس کی چار ارب ڈالر مالیت کا سامان برآمد کیا گیا ہے۔
انہوں نے کہا کہ ترقی یافتہ ممالک جاپان، جنوبی کوریا، امریکہ، فرانس، جرمنی اور چین وغیرہ کی معیشت کی توسیع اور استحکام مینوفیکچرنگ سیکٹر کی مضبوطی پر مبنی ہے۔ اس لیے ہندوستان کو ترقی یافتہ ممالک کے زمرے میں لانے کے لیے ہندوستان میں مینوفیکچرنگ سیکٹر کی توسیع بہت ضروری ہے۔ میک ان انڈیا، ڈیزائن ان انڈیا، انوویٹ ان انڈیا جیسے وزیر اعظم نریندر مودی کے مشن نے بڑا کردار ادا کیا ہے۔ آج ہندوستانی مصنوعات کا معیار اور قیمت دونوں عالمی مارکیٹ میں مسابقتی ہیں اور اس کی وجہ سے ہماری برآمدات بڑھ رہی ہیں۔
یواین آئی۔ ظ ا