بھوپال، 18 جون (یو این آئی) مدھیہ پردیش کے وزیر اعلیٰ ڈاکٹر موہن یادو آج چھندواڑہ ضلع کی امرواڑہ اسمبلی سے بھارتیہ جنتا پارٹی کے امیدوار کملیش شاہ کی نامزدگی میں حصہ لیں گے۔
پارٹی کی طرف سے دی گئی اطلاع کے مطابق ڈاکٹر یادو رات تقریباً 11.15 بجے امرواڑہ اسٹیڈیم گراؤنڈ میں پارٹی امیدوار مسٹر شاہ کی حمایت میں جلسہ عام سے خطاب کریں گے اور اس کے بعد وہ ان کی نامزدگی میں شامل ہوں گے۔ اس دوران پارٹی کے ریاستی صدر وشنودت شرما بھی موجود رہیں گے۔
کل ہی پارٹی نے اس اسمبلی سیٹ کے ضمنی انتخاب کے لیے اپنے اسٹار مہم چلانے والوں کی فہرست بھی جاری کی ہے، جس میں ڈاکٹر یادو اور مسٹر شرما کے ساتھ مرکزی وزراء شیوراج سنگھ چوہان، جیوترادتیہ سندھیا، ڈاکٹر وریندر کمار، درگا داس اوئیکے، ساوتری ٹھاکر کا نام بھی شامل ہے۔ پارٹی نے آسام کے وزیر اعلیٰ ہمنتا بسوا سرما، چھتیس گڑھ کے وزیر اعلیٰ وشنو دیو سائی، مہاراشٹر کے نائب وزیر اعلیٰ دیویندر فڑنویس اور سابق مرکزی وزیر اسمرتی ایرانی کو بھی یہاں انتخابی مہم کے لیے اسٹار پرچارک قرار دیا ہے۔
اس سیٹ پر 10 جولائی کو ووٹنگ ہونی ہے۔ یہاں سے پارٹی نے کانگریس کے سابق لیڈر اور اب بی جے پی لیڈر کملیش شاہ کو اپنا امیدوار قرار دیا ہے۔ کانگریس کی جانب سے امیدوار کے نام کا اعلان ہونا باقی ہے۔ یہ سیٹ مسٹر شاہ کے استعفیٰ کے بعد خالی ہوئی ہے۔
یہ سیٹ ریاست کے سابق وزیر اعلیٰ کمل ناتھ کے لیے وقار کا باعث بنی ہوئی ہے۔ یہاں سے بی جے پی کے امیدوار مسٹر شاہ کو کبھی مسٹر کمل ناتھ کا کٹر حامی سمجھا جاتا تھا لیکن لوک سبھا انتخابات کے دوران وہ کانگریس چھوڑ کر بی جے پی میں شامل ہو گئے۔ اس کے ساتھ ہی انہوں نے ایم ایل اے کے عہدے سے بھی استعفیٰ دے دیا۔ یہ پورا علاقہ مسٹر کمل ناتھ کا گڑھ سمجھا جاتا تھا، لیکن حالیہ لوک سبھا انتخابات میں مسٹر کمل ناتھ کے بیٹے نکول ناتھ، جو یہاں سے ایم پی تھے، کو بی جے پی کے امیدوار وویک ساہو سے شکست ہوئی اور یہ سیٹ بی جے پی کے پاس چلی گئی۔
گونڈوانا گنتنترا پارٹی (گونگپا) کا بھی اس سیٹ پر کافی غلبہ ہے۔ گونگپا نے یہاں سے دیو راون بھالاوی کو امیدوار قرار دیا ہے۔ مسٹر بھالاوی لوک سبھا انتخابات میں بھی پارٹی کے امیدوار تھے۔
یو این آئی۔ م ع۔ 1020