نئی دہلی، 30 نومبر (یو این آئی) ہندوستان کا مالیاتی خسارہ رواں مالی سال کے پہلے سات مہینوں یعنی اپریل سے اکتوبر 2022 کے دوران 7.54 لاکھ کروڑ روپے رہا، جو بجٹ میں تخمینہ لگائے گئے سالانہ تخمینہ کا 45.6 فیصد ہے۔
بدھ کو جاری کردہ وزارت خزانہ کے اعداد و شمار کے مطابق سال 2021-22 کی اسی مدت کے لیے مالیاتی خسارہ 5.47 لاکھ کروڑ روپے کے ساتھ سالانہ بجٹ تخمینہ کے 36.3 فیصد کے برابر تھا۔
رواں مالی سال میں اپریل تا اکتوبر کی مدت میں سرکاری وصولیاں 13.86 لاکھ کروڑ روپے اور اخراجات 21.4 لاکھ کروڑ روپے رہے۔ وصولیوں کا یہ اعداد و شمار سالانہ تخمینہ کا 60.7 فیصد اور اخراجات کا 54.3 فیصد ہے۔
اپریل-اکتوبر 2022 میں ریونیو کی وصولی 13.50 لاکھ کروڑ روپے رہی، جس میں ٹیکس ریونیو 11.71 لاکھ روپے اور نان ٹیکس ریونیو 1.79 لاکھ کروڑ روپے تھا۔ اس مدت کے دوران محصولاتی خسارہ 3.85 لاکھ کروڑ روپے تھا، جو پورے سال کے بجٹ تخمینہ کا 38.8 فیصد ہے۔
وزیر خزانہ نرملا سیتا رمن نے رواں مالی سال میں مالیاتی خسارے کو جی ڈی پی کے 6.4 فیصد تک محدود رکھنے کا ہدف مقرر کیا ہے۔ گزشتہ مالی سال میں مالیاتی خسارہ جی ڈی پی کا 6.7 فیصد تھا۔
حکومت نے اس سال مئی میں پیٹرول اور ڈیزل پر ٹیکس میں کمی کی تھی جس سے محصولات کی وصولی پر اثر پڑنے کی امید ہے۔
آئی سی آر اے کی چیف اکانومسٹ ادیتی نیر نے کہا کہ اپریل-اکتوبر 2022-23 میں مرکزی حکومت کے خالص ٹیکس ریونیو میں 11 فیصد کا زبردست اضافہ ہوا، جبکہ اسی مدت کے دوران نان ٹیکس ریونیو گزشتہ کے مقابلے میں 14 فیصد کم تھا۔ انہوں نے کہا کہ اسی مدت کے دوران محصولات کے اخراجات میں 10 فیصد اور سرمائے کے اخراجات میں 62 فیصد کے تیزی سے اضافے کی وجہ سے ان سات مہینوں میں مالیاتی خسارہ بڑھ کر 7.6 لاکھ کروڑ روپے تک پہنچ گیا ہے۔
آئی سی آر اے کا تخمینہ ہے کہ رواں مالی سال میں مالیاتی خسارہ 6.4 فیصد کے ہدف سے زیادہ نہیں جائے گا کیونکہ موجودہ مالی سال میں جی ڈی پی کی شرح نمو موجودہ قیمتوں پر 15 فیصد رہنے کی توقع ہے جبکہ بجٹ کی شرح نمو تقریبا 9.1 فیصد رہنے کی توقع ہے۔
یواین آئی۔ ظ ا