NationalPosted at: Aug 1 2020 5:21PM جولائی میں جی ایس ٹی کی ریکوری 87422 کروڑ
نئی دہلی،یکم جولائی(یواین آئی) کورونا وائرس کی روک تھام کے لئے لاک ڈاؤن کی وجہ سے معیشت متاثر ہونےسے سرکاری ریونیو کی وصولی بھی متاثر ہوئی ہے جس کی وجہ سے گذشتہ سال کے مقابلے میں رواں سال جولائی میں جی ایس ٹی کی وصولی 87422 کروڑ روپے رہ گئی ۔ گزشتہ سال اسی مہینے کے 102082 کروڑ کے مقابلہ میں یہ چودہ فیصد کم ہے۔
اگرچہ معاشی سرگرمیاں ان لاک ہونے کے بعد شروع ہوگئی ہیں اورمعیشت دوبارہ پٹری پر آرہی ہے ، لیکن جولائی میں بھی جون کے مقابلہ میں ریونیو کی وصولی میں کمی آئی ہے۔ رواں سال جون میں یہ وصولی90917 کروڑ روپے رہی۔
کورونا وائرس کے کیسز میں اضافہ ہونے کے بعد اپریل اور مئی کے مہینوں کے لئے جی ایس ٹی کی وصولی کے سرکاری اعداد و شمار جاری نہیں کیے گئے تھے۔ یہ اعداد و شمار جون میں جاری کیے گئے تھے۔ وزارت خزانہ نے آج یہاں اس سلسلے میں جاری ایک بیان میں کہا کہ جولائی میں جمع ہونے والی آمدن میں سی جی ایس ٹی 16147 کروڑ اور ایس جی ایس ٹی 21418 کروڑ تھی۔
آئی جی ایس ٹی کے طور پر 42592 کروڑروپے کا ریونیو ملا ہے جس میں 20324 کروڑ روپےدرآمدات پر حاصل ہونے والے ٹیکس ہیں۔ رواں ماہ میں معاوضہ سرچارج کے طور پر 7265 کروڑ روپے ریونیو حاصل ہوا ہے جس میں 807 کروڑ روپے کی درآمدات سے جمع محصول بھی شامل ہے۔
حکومت نے ریاستوں کو جولائی کے مہینے میں آئی جی ایس ٹی سے 23320کروڑوپے سی جی ایس ٹی کے طور پرمرکز کو 18838 کروڑ روپئے ایس جی ایس ٹی کے طور پر دیئے ہیں۔ اس طرح جولائی میں سی جی ایس ٹی کی مجموعی آمدنی 39467 کروڑ روپے اور ایس جی ایس ٹی کے طور پر 40256 کروڑ روپے رہی۔
لاک ڈاؤن کی وجہ سے رواں سال اپریل میں 32294 کروڑ روپے جی ایس ٹی وصول ہوا تھا ، جو اپریل 2019 میں جمع ہونے والی آمدن کا صرف 28 فیصد تھا۔ اسی طرح اس سال مئی میں یہ رقم 62009 کروڑ روپے تھی جو مئی 2019 میں جمع ہونے والی آمدن کا 62 فیصد تھی۔
لاک ڈاؤن کے دوران پورے ملک میں صرف ضروری خدمات جاری رکھی گئیں جبکہ مینوفیکچرنگ کی سرگرمیاں مکمل طور پر بند کردی گئیں۔
یواین آئی،اظ