NationalPosted at: Apr 7 2021 9:56PM ہندوستان اور چین کے کمانڈروں کی ملاقات جمعہ کو
نئی دہلی، 7 اپریل (یو این آئی) ہندوستان اور چین کے درمیان مشرقی لداخ میں گزشتہ سال سے جاری تعطل کو حل کرنے کے لئے دونوں افواج کے کور کمانڈروں کے درمیان 11 ویں دور کی بات چیت جمعہ کے روز ہوگی۔
فوج کے ایک سینئر افسر نے آج یہاں بتایا کہ"دونوں فوجوں کے کمانڈروں کے درمیان ہندوستانی سرحد پر چشول سیکٹر میں میٹنگ ہوگی جس میں اختلافی معاملوں گوگرا، ہاٹ اسپرنگ اور دیپسانگ کے مسائل سمیت مختلف زیر التواء امور پر تفصیلی بات چیت ہوگی"۔
ہندوستان کی طرف سے لیہہ میں تعینات 14 کور کمانڈر لیفٹیننٹ جنرل پی جی کے مینن نمائندگی کریں گے۔ دونوں فریقوں کے مابین دسویں دور کی بات چیت کے بعد فروری میں پیگونگ جھیل کے شمالی اور جنوبی کنارے سے دونوں فوجوں نے اپنے جوانوں کو پیچھے ہٹانا شروع کردیا تھا۔
یو این آئی۔ م ش۔ 1755