NationalPosted at: Sep 13 2017 4:43PM بچوں کے معاملے پر جاوڈیکر اور مینکا کی میٹنگ ملتوی
نئی دہلی، 13 ستمبر(یو این آئی) قومی دارالحکومت خطہ کے اسکولوں میں بچوں کے قتل اور عصمت دری کے واقعات کے مدنظرانسانی وسائل کے فروغ کے وزیر پرکاش جاوڈیکر اور خواتین اور بہبود اطفال کی وزیر مینکا گاندھی کی مجوزہ میٹنگ آج ملتوی ہوگئی۔ ذرائع نے بتایا کہ میٹنگ منسوخ نہیں بلکہ ملتوی ہوئی ہے اور بعد میں ہوگی لیکن اگلی میٹنگ کی تاریخ ابھی طے نہیں ہوئی ہے۔ ذرائع کے مطابق ناگزیر اسباب کی بنا پر یہ میٹنگ ملتوی کی گئی ہے لیکن ذرائع نے ان اسباب کی وضاحت نہیں کی۔ اس میٹنگ میں دونوں وزارتوں کے سینئر افسران بھی شامل ہونے والے تھے ۔ میٹنگ میں اسکولوں میں بچوں کو پوری طرح سلامتی فراہم کرنے کے بارے میں غور کیا جانا تھا۔ خیال رہے کہ گروگرام کے ریان اسکول میں گذشتہ دنوں ایک بچے کے قتل اور ایک دیگر اسکول میں ایک بچی کے ساتھ عصمت دری کے واقعہ کیبعد میڈیا اور شہریوں میں کافی غصہ ہے اور اسکولوں کی انتظامیہ کے غیر ذمہ دارانہ رویے کے سلسلے میں سوالات اٹھنے لگے تھے۔ مسٹر جاوڈیکر نے کہا تھا کہ ریان اسکول کے واقعہ میں انصاف ہوگا۔ انہوں نے اس واقعہ کی جانچ کے لئے دو رکنی کمیٹی بھی قائم کردی تھی۔ سرپرستوں کے مظاہرہ اور غصے کے مدنظر حکومت حرکت میں آئی ہے اور دونوں وزارتوں نے اس پر ایک میٹنگ طلب کی تھی لیکن یہ آج نہیں ہوسکی۔ یو این آئی ج ا