سری نگر14 ستمبر(یو این آئی)شمالی ضلع بارہ مولہ کے کریری علاقے میں سیکورٹی فورسز کے ساتھ تصادم میں تین مقامی ملی ٹینٹ مارے گئے ہیں۔معلوم ہوا ہے کہ مہلوک ملی ٹینٹوں کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا ۔
اطلاعات کے مطابق دس سیکٹر آرمی کے کمانڈر بریگیڈیر سنجے کنوٹھ نے میڈیا سے گفتگو کے دوران کہا کہ چیک ٹاپر کریری علاقے میں ملی ٹینٹوں کی موجودگی کی اطلاع موصول ہونے کے بعد فوج، جموں وکشمیر پولیس ، ایس او جی اور ایس ایس بی نے مشترکہ طورپر علاقے کو محاصرے میں لے کرتلاشی آپریشن شروع کیا۔انہوں نے کہاکہ رات گیارہ بجکر 15منٹ پر جوں ہی سلامتی عملے کے اہلکار مشتبہ مقام کے نزدیک پہنچے تو وہاں پر چھپے بیٹھے ملی ٹینٹوں نے فورسز پر اندھا دھند فائرنگ شروع کردی۔
بریگیڈیر سنجے کنوٹھ نے کہا :’سیکورٹی فورسز نے بھی پوزیشن سنبھال کر جوابی کارروائی شروع کی اور رات بھر دوبدو گولیوں کا تبادلہ جاری رہا۔ ‘نہوں نے مزید بتایا کہ ہفتے کی صبح سیکورٹی فورسز نے پیشہ وارانہ صلاحیتوں اور جد ید ٹیکنالوجی کو بروئے کار لاکر عمارت میں موجود تین دہشت گردوں کو مار گرایا۔
فوجی کمانڈر کے مطابق تصادم کی جگہ تین دہشت گردوں کی لاشیں برآمد کی گئیں جن کی شناخت اور تنظیمی وابستگی کے بارے میں جانچ پڑتال شروع کی گئی ہے۔ان کے مطابق مہلوک دہشت گردوں کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کیا گیا ہے۔ باوثوق ذرائع کے مطابق تصادم کے دوران تین مقامی ملی ٹینٹ مارے گئے جن میں سے دو گاندربل اور ایک شوپیاں کا ساکن ہے۔
یو این آئی، ارشید بٹ