RegionalPosted at: May 25 2020 3:46PM جموں و کشمیر کے ہوائی اڈوں پر بھی گھریلو فضائی خدمات بحال
سری نگر، 25 مئی (یو این آئی) ملک میں دو ماہ بعد گھریلو فضائی خدمات کی بحالی کے ساتھ ہی سری نگر اور جموں کے ہوائی اڈوں پر بھی پیر کے روز صبح سے ہی ملازمین و مسافرین کی گہماگہمی بحال ہوئی۔
واضح رہے کہ جموں وکشمیر کے ہوائی اڈوں پر کورونا وائرس کی روک تھام کے پیش نظر 25 مارچ کو ہوائی سفر خدمات کا سلسلہ معطل کیا گیا تھا۔
ذرائع نے بتایا کہ باہر سے آنے والے مسافروں کے مخصوص کوئنٹروں پر کورونا ٹیسٹ کے نمونے حاصل کئے گئے اور انہیں انتظامی قرنطینہ میں رکھا گیا۔
انہوں نے بتایا کہ مسافروں کو قرنطینہ مراکز سے ٹیسٹ رپورٹ منفی آنے کے بعد ہی اپنے اپنے گھروں کو جانے کی اجازت دی جائے گی۔ تاہم جن کی رپورٹ مثبت آئے گی انہیں علاج کے لئے ہسپتال منتقل کیا جائے گا۔
ذرائع نے بتایا کہ دونوں ہوائی اڈاوں پر مسافروں کی سکریننگ و دیگر سہولیات کے لئے موثر انتطامات کئے گئے ہیں۔
یونین ٹریٹری انتظامیہ نے تمام مسافرین سے کورونا پروٹوکال پر مکمل طور عمل درآمد کرنے کی اپیل کی ہے۔
قابل ذکر ہے کہ حکومت نے 21 مئی کو ملک میں گھریلو پروازوں کی 25 مئی سے بحالی کا اعلان کیا تھا تاہم بین الاقوامی سطح پر فضائی ٹریفک کی بحالی ہنوز معطل ہی ہے۔
یونین ٹریٹری انتظامیہ کی طرف سے جاری ایک حکمنامے میں کہا گیا ہے کہ باہر سے آنے والے تمام مسافروں کو ہوائی اڈوں پر ہی کورونا ٹیسٹ کرائے جانے کے بعد چودہ روزہ کورنٹائن کیا جائے گا جن کی رپورٹ منفی آئے گی انہیں گھر روانہ کیا جائے گا اور جن کی رپورٹ مثبت آئے گی انہیں علاج کے لئے کووڈ ہسپتال منتقل کیا جائے گا۔
یو این آئی -ایم افضل