سری نگر، 10 جولائی (یو این آئی) سری نگر میں جموں وکشمیر بنک کا کارپوریٹ ہیڈکوارٹرز جمعے کو مسلسل دوسرے دن بھی بند رہا جہاں گذشتہ روز 27 ملازمین کو کورونا وائرس میں مبتلا پایا گیا۔
بنک کے کورپوریٹ ہیڈکوارٹرز میں کام کرنے والے ملازمین کا الزام ہے کہ بنک انتظامیہ ان کی سیفٹی کو لیکر سنجیدہ نہیں ہے۔
ایک بنک ملازم نے نام نہ ظاہر کرنے کی شرط پر بتایا: 'کارپوریٹ ہیڈکوارٹرز میں کام کرنے والے ایک ملازم کا کورونا وائرس ٹیسٹ گذشتہ ہفتے مثبت آیا تھا۔ ایک ہفتے بعد باقی ملازمین کا کورونا ٹیسٹ کیا گیا جن میں سے 27 ملازمین کا ٹیسٹ مثبت آیا۔ اگر پہلا کیس سامنے آنے کے فوراً بعد ہی احتیاطی تدابیر اٹھائی جاتیں اور ملازمین کا وقت پر ہی ٹیسٹ کیا گیا ہوتا تو اتنی بڑی تعداد میں ملازمین متاثر نہیں ہوجاتے'۔
انہوں نے کہا: 'ہیڈکوارٹرز کے جس شعبے سے کورونا کا پہلا کیس سامنے آیا تھا اس شعبے کو بند کیا گیا تھا نہ کسی کو رضاکارانہ طور پر قرنطینہ میں جانے کے لئے کہا گیا تھا۔ سب کچھ معمول کی طرح جاری رکھا گیا اور آج نتیجہ ہمارے سامنے ہے'۔
ایک اور ملازم نے بتایا: 'کئی ملازمین نے انتظامیہ سے گزارش کی تھی کہ نمونوں کی رپورٹ آنے تک ہمیں اپنے گھروں سے کام کرنے کی اجازت دی جائے لیکن اس پر کوئی کان نہیں دھرا گیا'۔
انہوں نے کہا کہ بنک انتظامیہ کو جلد بازی سے کام نہ لینے کی بجائے سبھی ملازمین کا ایک بار پھر ٹیسٹ کرانا چاہیے اور رپورٹیں موصول ہونے تک انہیں اپنے گھروں سے کام کرنے کی اجازت دی جانی چاہیے۔
ذرائع نے بتایا کہ ملازمین کو پیر کے روز ڈیوٹی پر لوٹ جانے کے لئے کہا گیا ہے۔
انہوں نے کہا: 'بنک ہیڈکوارٹرز کو صرف جمعرات اور جمعے کے لئے بند کیا گیا تھا۔ ہفتے اور اتوار کو بنک کی چھٹی ہوتی ہے'۔
یو این آئی- ظ ح بٹ