RegionalPosted at: Aug 17 2017 2:11PM شمالی کشمیر کے گریز سیکٹر میں مسلح تصادم، 2 جنگجو ہلاک
سری نگر ، 17 اگست (یو ا ین آئی) شمالی کشمیر کے ضلع بانڈی پورہ کے گریز سیکٹر میں جمعرات کو ہونے والے ایک مسلح تصادم میں 2 جنگجوؤں کو ہلاک کیا گیا ہے۔ سرکاری ذرائع نے یو این آئی کو مسلح تصادم کی تفصیلات فراہم کرتے ہوئے بتایا کہ گریز کے کنڈلون جنگل میں مشتبہ افراد کی نقل وحرکت کے بعد سیکورٹی فورسز نے گذشتہ شام مذکورہ علاقے میں تلاشی آپریشن شروع کیا۔ انہوں نے بتایا کہ جنگل میں جمعرات کی صبح سیکورٹی فورسز اور جنگجوؤں کا آمنا سامنا ہوا۔ سرکاری ذرائع نے بتایا ’ سیکورٹی فورسز نے جنگجوؤں کو خودسپردگی کی پیش کی، لیکن انہوں نے یہ پیشکش ٹھکراتے ہوئے سیکورٹی فورسز پر اپنی بندوقوں کے دھانے کھول دیے‘۔ انہوں نے بتایا کہ سیکورٹی فورسز نے جوابی فائرنگ کی جس کے بعد طرفین کے مابین باضابطہ طور پر جھڑپ کا آغاز ہوا۔ ذرائع نے بتایا کہ جنگل میں جاری جنگجو مخالف آپریشن میں تاحال 2 جنگجوؤں کو ہلاک کیا گیا ہے۔ انہوں نے بتایا ’آخری اطلاعات ملنے تک جنگل میں جنگجو مخالف آپریشن جاری تھا‘۔ انہوں نے بتایا کہ جنگجوؤں کو آبادی والے علاقوں میں داخل ہونے سے روکنے کے لئے سیکورٹی فورسز کی اضافی نفری مسلح تصادم کے علاقہ کنڈلون جنگل روانہ کردی گئی ہے۔ یو این آئی۔ ظ ح بٹ۔ شا پ۔ 1359