RegionalPosted at: Jul 10 2020 8:12PM 'مرے ہوئے لوگ کوئی کہانی نہیں سناتے': گینگسٹر وکاس دوبے کی ہلاکت پر عمر عبداللہ کا تبصرہ
سری نگر، 10 جولائی (یو این آئی) نیشنل کانفرنس کے نائب صدر و سابق وزیر اعلیٰ عمر عبداللہ نے اتر پردیش کے کانپور میں ایک ڈپٹی سپرنٹنڈنٹ آف پولیس سمیت آٹھ پولیس اہلکاروں کو انتہائی بے رحمی کے ساتھ قتل کرنے والے ملزم گینگسٹر وکاس دوبے کی جمعے کی صبح ایک پولیس مقابلے میں ہلاکت پر تبصرہ کرتے ہوئے کہا ہے کہ 'مرے ہوئے لوگ کوئی کہانی نہیں سناتے ہیں'۔
ان کا بظاہر کہنا تھا کہ وکاس دوبے کئی بڑے لوگوں کے راز جانتے تھے اور ان کی ہلاکت کے ساتھ وہ راز بھی دفن ہوگئے ہیں۔
عمر عبداللہ نے 'وکاس دوبے' کا ہیش ٹیگ استعمال کرتے ہوئے اپنے ایک ٹویٹ میں لکھا: 'مرے ہوئے لوگ کوئی کہانی نہیں سناتے ہیں'۔
جموں وکشمیر پولیس کے سابق سربراہ ڈاکٹر شیش پال وید نے اپنے ایک ٹویٹ میں کہا کہ اترپردیش کی پولیس کریڈٹ کی مستحق ہے کیونکہ اس نے وکاس دوبے کو فرار ہونے میں کامیاب نہیں ہونے دیا۔
ان کا ٹویٹ میں کہنا تھا: 'یو پی پولیس کے مطابق بدنام زمانہ مجرم اور کانپور یو پی کے گینگسٹر وکاس دوبے کو جمعے کی صبح ایک تصادم میں مارا گیا۔ یو پی پولیس جس نے وکاس کو فرار ہونے میں کامیاب نہیں ہونے دیا، کریڈٹ کی مستحق ہے۔ اس کا فرار ہونا خطرناک ثابت ہوتا۔ سیاستدانوں – مجرموں – پولیس کے درمیان ساز باز سے پردہ اٹھانے کی ضرورت ہے'۔
واضح رہے کہ کانپورمیں آٹھ پولیس اہلکاروں کو قتل کرنے کے کیلدی ملزم وکاس دوبے جمعے کی صبح بھونتی علاقے کے قریب پولیس مقابلے میں مارے گئے۔
یو این آئی ۔ظ ح بٹ۔ شا پ۔ 1240