نئی دہلی، 22 اگست (یو این آئی ) دبنگ دہلی کی پرو کبڈی لیگ کے ساتویں سیزن میں شاندار کارکردگی چل رہی ہے اور ٹیم ہفتہ سے یہاں تياگ راج اسپورٹس کمپلیکس میں شروع ہونے والے اپنے گھریلو مرحلے پر بھی دبدبہ برقرار رکھنے کے ارادے سے اترے گی۔

دہلی کی ٹیم گزشتہ سال پلے آف میں پہنچی تھی اور اس سیزن میں بھی اس نے اپنی شاندار کارکردگی جاری رکھتے ہوئے سات میچوں میں پانچ میچ جیت لئے ہیں اور وہ 29 پوائنٹس کے ساتھ 12 ٹیموں کی ٹیبل میں دوسرے نمبر پر ہے۔

ٹیم کے کوچ کرشن ہڈا اور کپتان جوگندر نروال نے جمعرات کو تياگ راج اسٹیڈیم میں صحافیوں کو بتایاکہ ہماری ٹیم اس سال مسلسل اچھی کارکردگی کا مظاہرہ کر رہی ہے۔