NationalPosted at: Feb 24 2020 11:14PM کیجریوال نے بھگوان تو بھاردواج نے بجرنگ بلي کے نام پر حلف لیا
نئی دہلی، 24 فروری (یو این آئی) دہلی کی ساتویں اسمبلی کا پہلا سیشن پیر کو شروع ہوا اور نو منتخب ممبران اسمبلی کو عہدہ اور رازداری کا حلف دلایا گیا۔
تین دن کا اسمبلی سیشن شروع ہونے سے پہلے نو منتخب ممبران اسمبلی کو حلف دلانے کے لئے مٹیا محل سے عام آدمی پارٹی (آپ) کے ممبر اسمبلی شعیب اقبال کو عبوری اسپیکر بنایا گیا۔
سب سے پہلے وزیر اعلی اروند کیجریوال نے بھگوان کے نام پر حلف لیا۔ کیجریوال کابینہ کے دیگر وزیر منیش سسودیا، ستیندر جین، گوپال رائے، عمران حسین، راجندر پال گوتم اور کیلاش گہلوت نے حلف لیا۔ مسٹر جین نے بھگوان مہاویر کے نام پر حلف لیا جبکہ دیگر تمام وزراء نے بھگوان کے نام پر حلف لیا۔
مسٹر کیجریوال اور کابینہ کے ارکان کے حلف لینے کے بعد اسمبلی میں سلسلہ وار ممبران اسمبلی نے حلف لیا ۔ گریٹر کیلاش سے رکن اسمبلی سوربھ بھاردواج نے بجرنگ بلی کے نام پر تو براڑی سے آپ ممبر اسمبلی سنجیو جھا اور کراڑی ہی پارٹی کے ممبر اسمبلی ریتو راج جھا نے میتھلي زبان میں حلف لیا۔
ممبران اسمبلی کی حلف برداری کے بعد دوپہر بعد اسمبلی کے اسپیکر کا انتخاب ہوا۔ چھٹی اسمبلی کے اسپیکر شاہدرہ سے آپ کے ممبر اسمبلی رام نواس گوئل کو دوبارہ اسپیکر منتخب کرلیا گیا ۔
کل لیفٹیننٹ گورنر انل بیجل اسمبلی سے خطاب کر کے نئی حکومت کی اسکیموں کو پیش کریں گے۔ سیشن کے آخری دن 26 فروری کو لیفٹیننٹ گورنر کی تقریر پر شکریہ تجویز لائی جائے گی۔
اس سے پہلے بھارتیہ جنتا پارٹی (بی جے پی) کے ممبران اسمبلی نے بدرپور سے رکن اسمبلی رام ویر سنگھ ودھوڑي کو پارٹی اراکین کا لیڈر منتخب کیا اور وہ ایوان میں حزب اختلاف کے رہنما ہوں گے۔
یو این آئی۔ ع ا۔