نئی دہلی، 18اگست (یوا ین آئی) قومی آفت منیجمٹ کمیٹی کی مسلسل تیسرے دن آج یہاں ہوئی میٹنگ میں سیلاب کی صورتحال اور راحت و بچاو مہم کا جائزہ لیا گیا۔
کابینی سکریٹری پی کے سنگھ کی صدارت میں ہوئی میٹنگ میں کیرالہ کے چیف سکریٹری نے بھی ویڈیو کانفرنس کے ذریعہ حصہ لیا۔ میٹنگ میں بتایا گیا کہ راحت اور بچاو مہم میں 90سے زیادہ طیاروں، ہیلی کاپٹروں اور 500سے زائد موٹر بوٹ کے ساتھ سو سے زائد ٹیموں کو لگایا گیا ہے۔ راحت اور بچاو ٹیمیں زندگی بچانے والی جیکٹوں، کھانے کے پیکٹوں ، پانی کی بوتلوں، دوائی اور دیگر ضروری سازو سامان پھنسے ہوئے لوگوں تک پہنچا رہی ہیں۔
راحت اور بچاو مہم میں 67ہیلی کاپٹر، 24طیارے، 548موٹر بوٹ ، بحریہ، بری اور فضائی افواج ، ساحل محافظ دستہ، نیشنل ڈیزاسٹر ریسپونس فورس اور مرکزی پولیس دستوں کے ہزاروں بچاو کارکن لگے ہوئے ہیں۔
کابینی سکریٹری نے فضائیہ اور بحریہ سے پانچ اور ہیلی کاپٹروں کو اتوار کو مہم میں شامل کرنے کے لئے کہا ہے اور فاضل موٹر بوٹ بھی تیار رکھنے کے لئے کہا گیا ہے۔
جاری یو این آئی ۔ م ع ۔ 2030