OthersPosted at: May 25 2018 8:24PM کمار سوامی نے اعتماد کا ووٹ حاصل کیا
بنگلور،25 مئی (یو این آئی) کرناٹک میں مسٹر ایچ ڈی کمارسوامی کی قیادت والی کانگریس جنتادل (ایس)اتحادی حکومت نے آج اسمبلی میں اعتماد کا ووٹ حاصل کرلیا
اسمبلی اسپیکر رمیش کمار نے تحریک اعتماد کو صوتی ووٹ سے منظوری دے دی۔ اس دوران اپوزیشن بھارتیہ جنتا پارٹی (بی جے پی) کے اراکین ایوان میں موجود نہیں تھے۔بی جے پی اراکین نے اس سے پہلے وزیراعلی کے ذریعہ اپوزیشن کے لیڈر پر تبصرہ کے بعد ایوان سے واک آوٹ کردیا تھا۔
مسٹر کمارسوامی نے اپنے پہلے خطاب میں زور دیا کہ اتحادی حکومت اپنے پانچ برس کی مدت کار مکمل کرے گی۔ انہوں نے کہاکہ ان کا کوئی نجی ایجنڈہ نہیں ہے اور انہوں نے ریاست کی فلاح و بہود اور ترقی کے لئے اقتدار سنبھالا ہے۔
انہوں نے الزام لگایا کہ بی جے پی کسی بھی طرح اقتدار میں آنے کے لئے اراکین اسمبلی کی خرید وفروخت کی کوشش کررہی ہے۔ انہوں نے بی جے پی کے ہی جمہوریت کی محافظ ہونے سے متعلق وزیراعظم نریندر مودی کے بیان پران پر الزام لگایا کہ وہ (وزیراعظم) چاہتے ہیں کہ لوگ یہ یقینی بنائیں کہ مرکز اور ریاست میں ایک ہی پارٹی کی حکومت ہو۔ انہوں نے کسانوں کی قرض معافی کے تعلق سے اپنی حکومت کے عزم کا اعادہ کرتے ہوئے کہاکہ اتحادی حکومت میں اتحادی کانگریس کے ساتھ تبادلہ خیال کے بعد اس سمت میں ہر ممکن کوشش کی جائے گی۔ انہوں نے حالانکہ قرض معافی کاکوئی وقت نہیں بتایا۔
یو این آئی ۔ م ع۔ 1825