نئی دہلی،22جولائی(یواین آئی)موجودہ لوک سبھا کے رکن رام چندر پاسوان اور کانگریس کے سینئر لیڈر اور دہلی کی سابق وزیراعلی شیلا دکشت کو خراج عقیدت پیش کرنے کے بعد پارلیمنٹ کے ایوان زیریں کی کارروائی دوپہر دوبجے تک کے لئے ملتوی کردی گئی۔پارلیمنٹ کے ایوان بالاراجیہ سبھا میں بھی محترمہ دکشت کو خراج عقیدت پیش کی گئی۔
لوک سبھا میں صبح 11بجے ایوان کی کارروائی شروع ہونے پر اسپیکر اوم برلا نے ایوان کو مسٹرپاسوان اور محترمہ دکشت کے انتقال کی اطلاع دی۔انہوں نے بتایا کہ مسٹر پاسوان 13ویں ،14ویں اور 16ویں لوک سبھا کے رکن رہے۔وہ 17ویں لوک سبھا میں بہار کی سمستی پور سیٹ سے منتخب ہوئے تھے۔57سالہ مسٹر پاسوان مختلف وزارتوں اور محکموں سے منسلک پارلیمانی مستقل کمیٹیوں کے رکن رہے اور وہ سرگرم سماجی سیاست داں اور کارکن کے طورپر دلتوں اور پسماندوں کے فلاح و بہبود کےلئے کام کرتے رہے۔
لوک سبھا اسپیکر نے کہا کہ محترمہ دکشت آٹھویں لوک سبھا میں اترپردیش کی قنوج سیٹ سے رکن منتخب ہوئیں تھیں۔وہ تین بار دہلی اسمبلی کی رکن رہیں۔وہ 1998 سے 2013 تک دہلی کی وزیراعلی اور 2014 میں کیرالہ کی گورنر بنیں تھیں۔وہ مرکزی حکومت میں شہری ترقی سمیت متعدد محکموں کی وزیر بھی رہیں۔
بعد میں ایوان کے سبھی اراکین نے دو منٹ کے لئے خاموشی اختیار کی۔اسپیکر نے اس کے بعد ایوان کی کارروائی دو بجے تک کےلئے ملتوی کرنے کا اعلان کردیا۔
راجیہ سبھا میں 11بجے کارروائی شروع ہوتے ہی چیئرمین ایم وینکئیا نائیڈو نے محترمہ دکشت کے انتقال کی اطلاع دی اور اراکین نے دو منٹ کے لئے خاموشی اختیار کرکے انہیں خراج عقیدت پیش کیا۔اس کے بعد وقفہ صفر کی کارروائی شروع ہوئی۔
یواین آئی۔اےایم۔