نئی دہلی ،26مئی (یواین آئی)وزیراعظم نریندرمودی نے اپنی حکومت کے چارسال مکل ہونے کے موقع پر لوگوں کے ذہن کوٹٹولنے کے لئے نریندرمودی موبائل ایپ پر آج ایک سروے شروع کیا ہے ۔
مسٹر مودی نے ٹوئیٹر پر اسکا اعلان کرتے ہوئے کہ ،’’یہ آپ کی آواز ہے جسکی اہمیت ہے ۔مجھے بتائیے کہ آپ اپنے علاقہ میں مرکزی حکومت کے کام کاج ،اسکی پہل اور ترقیاتی کاموں کے بارے میں کیا محسوس کرتے ہیں ۔نموایپ پر اس سروے میں حصہ لیجئے ۔‘‘
سروے کے پانچ حصے ہیں ۔پہلے حصہ میں لوگوں سے کفایتی ہیلتھ سکیورٹی ،روزگار کے مواقع،دیہی الیکٹری فکیشن اور کسانوں کی خوشحالی کے چار پوائنٹ پر بہت خراب سے بہت اچھاتک کے پیمانے پر ووٹ دینے کو کہا گیاہے ۔دوسرے حصہ میں پوچھاگیاہے کہ ووٹ دینے کے لئے انکے ذہن میں فیصلہ کن کون سا عنصر ہوگا ۔اس میں مہنگائی ،امن وقانون ،تعلیم ،روزگار ،صفائی ستھرائی ،بدعنوانی اور کسانوں کی بہبود کے متبادل دئے گئے ہیں ۔
سروے کے تیسرے حصہ میں مرکزی حکومت کے کام کاج کی ریٹنگ پوچھی گئی ہے جبکہ چوتھے حصہ میں لوگوں سے ایک خالی باکس میں یہ لکھنے کی درخواست کی گئی ہے کہ انکے خیال میں مرکزی حکومت کی تین سب سے مقبول اسکیمیں کون سی ہیں ۔پانچویں حصہ میں لوگوں سے کہاگیاہے کہ اگر وہ کوئی تجویزپیش کرنا چاہتے ہیں تو پیش کریں ۔
یواین آئی۔ایف اے