نئی دہلی، 8اگست (یو این آئی) وزیراعظم نریندر مودی نے کورونا وبا سے لڑنے میں صفائی ستھرائی کی اہمیت پر زور دیتے ہوئے پورے ملک میں آئندہ ایک ہفتہ تک’گندگی بھارت چھوڑو‘ مہم چلانے کی اپیل کی ہے۔
راجدھانی میں راج گھاٹ کے نزدیک آج قومی سوچھتا مرکز کا افتتاح کرنے کے بعد وزیراعظم نے کہاکہ کورونا وبا سے لڑنے میں صفائی ستھرائی نے اہم کردار ادا کیا ہے۔کورونا کے خلاف لڑائی میں ملک کو ملی کامیابی میں ’سوچھ بھارت ’مہم کا بڑا کردار رہا ہے۔
انہوں نے شہریوں سے اپیل کرتے ہوئے کہا کہ آج سے پندرہ اگست تک یعنی یوم آزادی تک ملک میں ایک ہفتہ طویل مہم چلائیں۔ سوراج کا احترام ہفتہ یعنی ’گندگی بھارت چھوڑ ہفتہ‘۔ میری ہر ضلع کے ذمہ دار افسروں سے درخواست ہے کہ اس ہفتہ میں اپنے اپنے اضلاع کے تمام گاووں میں کمیونٹی ٹوائلٹ بنانے، ان کی مرمت کی مہم چلائیں۔ جہاں دوسری ریاستوں کے مزدور ساتھی رہ رہے ہیں ان مقامات پر ترجیحی بنیاد پر یہ ہو۔ اسی طرح گندگی سے کمپوسٹ بنانے کا کام ہو، گوبردھن ہو، آبی وسائل بنیں، سنگل یوز پلاسٹک سے آزادی ہو، اس کیلئے ہمیں ملکر آگے بڑھنا ہے۔
کورونا کے خلاف جنگ میں صفائی ستھرائی کی اہمیت کا ذکر کرتے ہوئے انہوں نے کہاکہ ملک کے بچے بچے میں نجی اور سماجی صفائی ستھرائی سے متعلق بیداری آئی ہے۔ اس کا بہت بڑا حصہ کورونا کے خلاف لڑائی میں بھی ہمیں مل رہا ہے۔ آپ ذرا سوچئے اگر کورونا جیسی وبا 2014سے پہلے آتی تو کیا صورتحال ہوتی؟ ٹوائلٹ کی کمی سے کیا ہم انفیکشن کی رفتار کو کم کرپاتے؟ کیا تب لاک ڈاون جیسے انتظامات ممکن ہوپاتے، جب ہندستان کی 60فیصد آبادی کھلے میں ٹوائلیٹ کے لئے مجبوری تھی صفائی ستھرائی نے ہمیں کورونا کے خلاف لڑائی بہت بڑا سہارا دیا ہے۔
جاری یو این آئی۔م ع۔ 2236