واشنگٹن، 25 جون (یو این آئی) وزیر اعظم نریندر مودی کے امریکی دورے سے پہلے ہندوستان کو دو محاذوں پر بڑی سفارتی کامیابی ملی ہے۔دونوں کے لئے حکومت ہند طویل عرصے سے سفارتی سطح پر امریکہ پر دباؤ بنا رہی تھی۔ پہلا یہ کہ امریکہ نے ہندوستان کو 22 امریکی 'گارڈین ڈرون' کے سودے کو منظوری دے دی ہے۔یہ ڈرون اب صرف امریکی فوج استعمال کرتی ہے۔ دوسری سفارتی کامیابی پاکستان کے محاذ پر ملی ہے۔ امریکی کانگریس میں پاکستان سے متعلق ایک بل لایا گیا ہے۔ اس میں اس کے 'اہم غیر ناٹو اتحادی ( ایم این این اے)' کا درجہ منسوخ کرنے کی سفارش کی گئی ہے۔ یہ بل ریپبلکن اور ڈیموکریٹ دونوں ہی کی جانب سے لایا گیا ہے۔ امریکی وزارت خارجہ کے حکام نے ہندوستان وزارت خارجہ کو اس تجویز کی منظوری کی تفصیل بھیجی ہے۔ ابھی وزارت دفاع اور ہندوستانی بحریہ کے افسر ان ڈرون کے سودے کے دستاویز کی تیاری میں مصروف ہیں۔ وزارت خارجہ کے حکام نے امریکہ سے موصولہ تفصیلات کی بنیاد پر بتایا کہ یہ سودا تین ارب ڈالر کا ہے۔ وزارت خارجہ میں یورپ ڈیسک کے ایک سینئر افسر کے مطابق ہندوستان گزشتہ کافی عرصے سے نگرانی کرنے والے امریکی 'گارڈین ڈرون' کی ٹیکنالوجی حاصل کرنے کی کوشش میں لگا ہوا تھا۔ اس سودے پر ٹرمپ کے پیشرو اوباما انتظامیہ نے وعدہ بھی کیا تھا۔ ہندوستان پہلا ایسا غیر نیٹو اتحادی ملک ہے، جسے امریکہ اپنی ڈرون ٹیکنالوجی سونپنے جا رہا ہے۔ 'گارڈین ڈرون' ملنے سے ہندوستان کے لئے اب بحر ہند میں چین کی بڑھتی ہوئی فوجی سرگرمیوں کی نگرانی میں کافی آسانی ہو جائے گی۔ یو این آئی ۔م ش ۔ 0910