نئی دہلی، 3 دسمبر (یو این آئی) صدرجمہوریہ دروپدی مرمو نے منگل کو معذور افراد کے بین الاقوامی دن کے موقع پر دارالحکومت میں منعقدہ ایک تقریب میں نیشنل ڈس ایبلٹی امپاورمنٹ ایوارڈ 2024 پیش کیا اور معذور افراد کے درمیان انٹرپرینیورشپ کی حوصلہ افزائی کرنے پر زور دیا۔
تمام ایوارڈ جیتنے والوں کو مبارکباد دیتے ہوئے صدر جمہوریہ نے کہا کہ یہ ایوارڈز دور رس سماجی اہمیت کے حامل ہیں۔ ان کی تقلید کرتے ہوئے دیگر افراد اور ادارے معذور افراد کو بااختیار بنانے کی سمت میں آگے بڑھ سکتے ہیں۔
اس سال کے معذور افراد کے عالمی دن کی تھیم، 'ایک جامع اور پائیدار مستقبل کے لیے معذور افراد کی قیادت کو فروغ دینا' کے بارے میں گفتگو کرتے ہوئے صدرجمہوریہ نے کہا کہ معذور افراد میں کاروباری صلاحیت کو فروغ دینے، ان کی ہنرمندی کو ترقی دینے، روزگار فراہم کرنے، ان کی مصنوعات کی خریداری اور مارکیٹنگ کی سہولیات فراہم کرنے سے ان کی قائدانہ صلاحیتوں کو تقویت ملے گی۔
محترمہ مرمو نے کہا کہ پوری انسانیت کو کچھ ایسا کرنا چاہئے، تاکہ معذور افراد خود کو آرام دہ اور برابر محسوس کرسکیں۔ انہیں ہر طرح سے رکاوٹوں سے پاک ماحول فراہم کرانا معاشرے کی اولین ترجیح ہونی چاہیے۔ انہوں نے کہا کہ وہی معاشرہ صحیح معنوں میں حساس کہا جاسکتا ہے جس میں معذور افراد کو یکساں سہولیات اور مواقع میسر ہوں۔
صدر نے کہا کہ دویانگ ہونا کسی بھی قسم کی کمی نہیں بلکہ یہ ایک خاص صورتحال ہے۔ معذور افراد کو مساوی احساس کی ضرورت ہے، ہمدردی کی نہیں، حساسیت کی ضرورت ہے، رحم کی نہیں، انہیں فطری پیار کی ضرورت ہے، خصوصی توجہ کی نہیں۔ معاشرے کو اس بات کو یقینی بنانا چاہیے کہ معذور افراد معاشرے کے دیگر ارکان کے ساتھ برابری، وقار اور احترام کا تجربہ کریں۔
محترمہ مرمو نے کہا کہ کسی بھی شخص کی طرح کام کرنے کا موقع معذور افراد میں خود اعتمادی اور بامعنی زندگی گزارنے کا جذبہ پیدا کرتا ہے۔ اس طرح، روزگار، انٹرپرائز اور اقتصادی بااختیار بنانے کے ذریعے ان کی زندگیوں کو بہتر بنایا جا سکتا ہے۔
یواین آئی۔الف الف