NationalPosted at: Feb 17 2019 11:36PM نیشنل ٹرائبل کمیشن کے 15 ویں یوم تاسیس میں ونکیا نائیڈو شرکت کریں گے
نئی دہلی ،17 فروری (یواین آئی) نائب صدر جمہوریہ ایم ونکیا نائیڈو منگل کو نیشنل ٹرائبل کمیشن ( این سی ایس ٹی) کے 15 ویں یوم تاسیس کی تقریب کا افتتاح کریں گے۔مرکزی قبائلی وزارت نے اتوار کو یہاں بتایا کہ کمیشن کے 31 دسمبر 2018 کو 109 ویں اجلاس میں نیشنل ٹرائبل کمیشن کے 15 ویں یوم تاسیس کی تقریب منانے کا فیصلہ کیا گیاتھا۔ کمیشن کا قیام 2004 میں 19 فروری کو آئینی (89 ترمیم) ایکٹ کے تحت عمل میں آیا تھا۔
یوم تاسیس کی تقریب میں مسٹر نائیڈو ’آئین اور قبائل‘ کے عنوان پر لیکچر دیں گے۔ اس موقع پر کمیشن’این سی ایس ٹی قیادت ایوارڈ' بھی دے گا۔ یہ ایوارڈ قبائلی برادریوں کی خدمات اور فلاح و بہبود کے لئے دیاجائے گا۔ یہ تین زمروں میں دیا جائے گا۔ ان میں تعلیمی ادارے اور یونیورسٹی، سرکاری صنعت اور بینکنگ اور شخص یا غیر سرکاری تنظیم شامل ہیں۔
اس سال یہ ایوارڈ بھونیشور کے كلنگ انسٹی ٹیوٹ آف سوشل سائنسز، رانچی کے سینٹرل کول فیلڈز لمیٹڈ اور ’انڈمان آدم جنجاتی وکاس سمیتی‘ ویلفیئر افسر ڈاکٹر پرنب کمار سركر کو دیاجائےگا۔ایوارڈ انعام کی شکل میں ایک توصیفی سند، ایک تمغہ اور شال پیش کیا جائے گا۔
تقریب میں جنگ آزادی میں قبائلی برادری کے تعاون کو نمایاں کرنے والی کتاب ’جنجاتی سوادھینتا سنگرام ‘ کی رونمائی بھی ہوگی۔
یو این آئی،اظ