InternationalPosted at: Sep 10 2019 11:01PM عراق کے کربلا میں بھگدڑ میں 31 زائرین جاں بحق ،100 زخمی
بغداد، 10 ستمبر(یو این آئی )عراق کے جنوبی شہر کربلا میں یومِ عاشور کے جلوس کے دوران میں گذرگاہ کا ایک حصہ گر گیا ہے جس سے 31 افراد ہلاک اور100 سے زائد زخمی ہوگئے ہیں۔
عراقی وزارت صحت کے ترجمان سیف البدر نے یہ اطلاع دی ہے۔
سکیورٹی ذرائع کے مطابق کربلا میں یہ واقعہ ماتمی جلوس کے آخری سرے میں پیش آیا ہے جس سے لوگوں میں افراتفری پھیل گئی اور بھگدڑ مچ گئی۔
کربلا میں دس محرم کے جلوس میں ہزاروں افراد نے شرکت کی ہے اور عراق کے علاوہ دنیا کے دوسرے ملکوں سے بھی اہلِ تشیع اس جلوس میں شرکت کے لیے آئے تھے۔ عراقی حکومت نے اس موقع پر سکیورٹی کے سخت انتظامات کیے تھے۔
وزارت کے ترجمان نے ایک بیان جاری کر کے کہا، "کربلا کی بھگدڑ میں مرنے والوں کی تعداد بڑھ کر 31 ہو گئی ہے اور 100 دیگر زخمی ہوئے ہیں۔اس سے پہلے 16 لوگوں کے مارے جانے کی اطلاع تھی۔ "
خیال رہے کہ نواسہ رسول ﷺ حضرت امام حسینؓ کے یوم شہادت کے روز دنیا بھر سے لاکھوں افراد کربلا میں جمع ہوتے ہیں۔حضرت امام حسین رضی اللہ عنہ اور اُن کے ساتھیوں کی عظیم قربانی کی یاد میں یوم عاشور کے موقع پر جلوس نکالے جاتے ہیں۔یومِ عاشور ہر سال اسلامی کیلنڈر کے پہلے مہینے کی 10 تاریخ کو منایا جاتا ہے۔ اسی مناسبت سے 10 محرّم کو یومِ عاشور بھی کہا جاتا ہے۔
اس موقع پر عزاداران حضرت حسین کی یاد میں مجالس کا انعقاد کرتے ہیں جب کہ ماتمی جلوس بھی نکالے جاتے ہیں۔
یویان آئی۔ م س