InternationalPosted at: Sep 18 2020 10:40AM برازیل میں کووڈ19 سے اب تک 1.34 لاکھ سے زیادہ افراد ہلاک
برازیلیا،18ستمبر( یواین آئی)لاطینی امریکی ملک برازیل میں گزشتہ 24 گھنٹوں کے دوران کوروناوائرس سے مزید 829 افراد کی ہلاکت سے مرنے والوں کی تعداد بڑھ کر 1،34،935 ہوگئی ہے۔
برازیل کی وزارت صحت کی جانب سے جمعہ کے روز جاری تازہ ترین اعداد و شمار کے مطابق ملک میں گذشتہ 24 گھنٹوں کے دوران کورونا کے 36،303 نئے کیسز رپورٹ ہوئے جس کے ساتھ ہی متاثرین کی مجموعی تعداد 44،55،386 ہوگئی ہے۔
امریکہ کی جان ہاپکنز یونیورسٹی کے سینٹر فار سائنس اینڈ انجینئرنگ (سی ایس ایس ای) کی جانب سے جاری تازہ ترین اعدادوشمار کے مطابق برازیل (44.55 لاکھ) ، امریکہ (66.74 لاکھ) اور ہندوستان (51.18 لاکھ) کے بعد تیسرے نمبر پر ہے۔ کورونا سے ہونے والی اموات کی فہرست میں برازیل امریکہ کے بعد دوسرے نمبر پر ہے۔
برازیل کا سب سے زیادہ آبادی والا شہر ساؤ پالو کورونا سے شدید متاثر ہے اور اب تک اس شہر میں 9،16،821 افراد جان لیوا وبا سے متاثر جبکہ اس وبا سے 33،472 افراد لقمہ اجل بن چکے ہیں۔ اس کے بعد ریو ڈی جنیرو میں کوروناوائرس کے 2،46،843 کیسز کی تصدیق ہوچکی ہے جبکہ 17،453 افراد لقمہ اجل بن چکے ہیں۔
یواین آئی،اظ