InternationalPosted at: Mar 31 2023 12:41PM پاکستان 1973 کے آئین کی 50 ویں سالگرہ منائے گا: اشرف
اسلام آباد، 31 مارچ (یو این آئی) پاکستان کی قومی پارلیمنٹ کے اسپیکر راجہ پرویز اشرف نے کہا کہ ملک کے آئین کی 50ویں گولڈن جوبلی جوش و جذبے کے ساتھ منائی جائے گی۔
جمعرات کو یہاں میڈیا سے بات کرتے ہوئے مسٹر اشرف نے کہا کہ جس عمارت میں اس وقت کی قومی پارلیمنٹ کا اجلاس ہوا تھا اور 1973 میں آئین منظور ہوا تھا، اسے حکومت قومی اثاثہ قرار دے گی۔
انہوں نے کہا کہ آئین کی منظوری کے تاریخی واقعہ کی یاد میں 10 اپریل کو پارلیمنٹ کا مشترکہ اجلاس بھی اسی عمارت میں منعقد کیاجائے گا۔ انہوں نے کہا کہ اسلام آباد میں پاکستان کی پارلیمانی اور آئینی تاریخ کی عکاسی کے لیے ایک یادگار تعمیر کی جائے گی۔
مسٹراشرف نے کہا کہ اس موقع پر اسلام آباد میں تین روزہ بین الاقوامی کانفرنس کا انعقاد کیا جائے گا جس میں دنیا بھر سے پاکستانی نژاد ارکان پارلیمنٹ کو اس پروگرم میں شرکت کی دعوت دی گئی ہے۔
قابل ذکر ہے کہ پاکستان کے آئین کو 10 اپریل 1973 کواس کی قومی اسمبلی نے منظور کیا تھا اور 14 اگست 1973 کو اس کی توثیق کی گئی تھی۔
یواین آئی۔الف الف