نئی دہلی، 18 مئی (یو این آئی) لوک سبھا انتخابات کے ساتویں اور آخری مرحلے میں اتوار کو 7 ریاستوں کی 59 سیٹوں پر ہونے والی پولنگ کے لئے تمام ضروری تیاریاں مکمل کر لی گئی ہیں۔
سخت سکیورٹی بندوبست کے درمیان اس مرحلے کے لئے ووٹنگ صبح سات بجے شروع ہوگی اور ووٹر شام چھ بجے تک اپنے ووٹ کےحق کا استعمال کر سکیں گے۔ شام چھ بجے پولنگ مراکز کے دروازے بند کر دیے جائیں گے لیکن جو ووٹر اس سے پہلے مرکز کے اندر چلا جائے گا اور لائن میں کھڑ ہوجائے گا اسے ووٹ ڈالنے کا حق حاصل ہو گا۔ دور دراز کے علاقوں میں انتخابی اہلکار ضروری انتخابی سامان کے ساتھ پولنگ مراکز میں پہنچنا شروع ہو گئے ہیں۔
سب سے اونچے پولنگ مرکز ہماچل پردیش کے ضلع لاحول ا سپیتی کے ٹشیگنگ میں بھی ووٹنگ کی تمام تیاریاں مکمل کر لی گئی ہیں۔منڈی پارلیمانی حلقہ کے تحت آنے والا یہ ووٹنگ مرکز 15256 فٹ کی بلندی پر واقع ہے۔ اس ووٹنگ مرکز کے ارد گرد کے علاقے میں اکثر برف کی موٹی چادر چڑھی رہتی ہے اور انتظامیہ نے اسے دور کرنے کے لئے تمام انتظامات کئے ہیں۔ اس مرکز پر ہیلی کاپٹر سے ای وی ایم پہنچائی گئی ہیں۔
الیکشن کمیشن نے آزاد اور منصفانہ انتخابات کرانے کے لئے سکیورٹی کے سخت انتظامات کئے ہیں اور تمام لوک سبھا حلقوں میں انتخابی سپروائزر اور نگرانی ٹیمیں تمام سرگرمیوں پر نظر رکھی ہوئی ہیں۔ پولنگ مراکز کے پاس سکیورٹی کے چاک چوبند انتظامات کئے گئے ہیں جبکہ حساس اور انتہائی حساس پولنگ مراکز پر مرکزی پولس فورس کی اضافی تعیناتی کی گئی ہے۔مغربی بنگال میں تشدد کے واقعات کو دیکھتے ہوئے خصوصی حفاظتی انتظامات کئے گئے ہیں۔وہاں سریع الحرکت ٹیموں کو بھی تعینات کیا گیا ہے۔
جاری۔ یو این آئی ۔م ش ۔ 1850