NationalPosted at: Jul 18 2019 12:12PM لوگوں کو اعلی سطحی صحت خدمات ملیں گی
نئی دہلی،18جولائی(یواین آئی)حکومت نے کہا ہے کہ وہ عوامی صحت کے سلسلے میں ایسا ماحول بنانے کی کوشش کرے گی جس میں ملک کے سبھی شہریوں کےلئے کفایتی اور اعلی معیاری صحت خدمات مہیاہوں۔
صحت کو بنیادی حق بنانے کے مطالبے کے سلسلے میں فاؤنڈیشن کے اراکین نے یوا سماج سیوی اور ’جن سواستھ اور سمگر مانو وکاس فاؤنڈیشن‘ کے چیئرمین اجے کمار کی قیادت میں مرکزی صحت اور خاندان کے فلاح و بہبود کے وزیر ڈاکٹر ہرش وردھن سے گزشتہ مہینے ملاقات کی تھی جس پر وزارت نے مستعدی دکھاتے ہوئے اس سلسلے میں ایک خط جاری کیاہے۔
خط میں کہا گیاہےکہ مرکزی حکومت عام لوگوں کی صحت کےسلسلے میں کافی سنجیدہ ہے اور اس کےلئے باقائدہ حکومت کی طرف سے قومی صحت پالیسی بنائی گئی ہے جس میں لوگوں کو کفایتی اور اعلی معیاری صحت خدمات مہیا کرائی جاسکیں،اس کا دھیان رکھاگیاہے ۔اس کے ساتھ ہی ہر عمر کے لوگوں کوبہتر سے بہتر صحت خدمات مہیا کرائی جاسکیں اس کا بھی خیال رکھا گیا ہے۔وزارت کی جانب سے کہا گیا ہے کہ اس طرح کے انتظامات کے ذریعہ ملک میں عوامی صحت کےلئے ایسا ماحول تیار کرنے کی کوشش کی گئی ہے تاکہ لوگ اسے مستقبل میں ایک حق کے طورپر استعمال کرسکیں۔حکومت کی کوشش ملک کے لوگوں کو کفایتی اور اعلی معیاری صحت خدمات مہیا کرانا ہے۔
مسٹر اجے کمار نے کہا کہ وزارت کی طرف سے دئے گئے جواب سے واضح ہے کہ حکومت صحت کے سلسلے میں کافی سنجیدہ ہے ۔مرکز کی حالیہ حکومت نے اپنے پچھلے پروگرام میں ذہنی صحت کو بنیادی حق کا درجہ دےکر اپنی حساسیت کا ثبوت دیاہے اور ہمیں امید ہے کہ یہ حکومت صحت کی سمت میں بہتر کام کرے گی۔’جن سواستھ اور سمگر مانو وکاس فاؤنڈیشن‘ کی سکریٹری تنوجا سنہا اور فاؤنڈیشن کے رکن اور سواستھ سینا کے کنوینردھیرج رائے سکریٹری رتناکر سنگھ نے بھی مرکزی وزیر صحت ڈاکٹر ہرش وردھن کے تئیں شکریہ کا اظہار کیاہے۔
یواین آئی۔اےایم۔