نئی دہلی، 16 دسمبر (یو این آئی) اقلیتی امور کے مرکزی وزیر مختار عباس نقوی نے ہندستانی مسلمانوں سے اپیل کی ہے کہ وہ ترمیم شدہ شہریت ایکٹ کے تعلق سے اپنے مستقبل کے بارے میں گمراہ کن مہم کے شکار نہ ہوں یہاں ایک نیوز چینل کے زیر اہتمام پروگرام میں انہوں نے کہا کہ ہندستان میں مسلمان محفوظ ہیں اور ان کا مستقل مامون ہے۔ ایسے پروپگینڈے پر یقین نہ کریں کہ انہیں پاکستان بھیج دیا جائے گا  مسٹر نقوی نے مزید کہا کہ مفاد پرست عناصر جو کچھ کہہ رہے ہیں انہیں کہنے دیا جائے لیکن (مسلمان) ان کے عزائم کے شکار نہ ہوں۔
انہوں نے کہا کہ غلط اطلاعات ، اطلاعات کے مقابلے میں زیادہ تیزی سے پھیلتی ہیں اور زیر بحث معاملے میں ایسا ہی ہورہا ہے جبکہ ہم ہر طرح کے تشدد کی مذمت کرتے ہیں۔
وزیر موصوف نے کہا کہ ہندستانی مسلمانوں کا اس ملک کے ساتھ ایک مضبوط تہذیبی اور روایتی رشتہ ہے لہذا انہیں اپنے تحفظ ، سلامتی اور مستقبل کے تعلق سے کسی اندیشے کا شکار نہیں ہونا چاہئے۔
این آر سی کے تعلق سے انہوں نے کہا کہ یہ عمل ابھی مکمل نہیں ہوا ۔ یہ ایک جاری عمل ہے جس میں متاثرین کو راحت پہنچانے کی گنجائشیں رکھی گئی ہیں ۔
بحث میں حصہ لیتے ہوئے مجلس اتحاد المسلمین کے صدر اسد الدین اویسی نے جب سوا ل کیا کہ پولیس جامعہ ملیہ اسلامیہ میں وائس چانسلر کی اجازت کے بغیر کیسے داخل ہوگئی تو مسٹر نقوی نے جواب دیا جہاں ہر قسم کا تشدد قابل مذمت ہو، وہیں بلااجازت پولیس کے کیمپس میں واقع ہونے کا واقعہ پہلے بھی پیش آچکا ہے۔
یو این آئی۔سلام ۔ ایم جے۔