نئی دہلی، 21جنوری (یو این آئی عابد انور) قومی شہریت ترمیمی قانون، این آر سی اور این پی آر کے خلاف شاہین باغ طرز پر احتجاج کرنے والی خوریجی کی خاتون مظاہرین کو سلام کرتے ہوئے مشہور مصنف اور سابق آئی اے ایس افسر ہرش مندر نے کہاکہ ہمیں متحد ہوکر یہ طے کرنا ہوگا کہ ہم کسی بھی صورت میں کاغذ نہیں دکھائیں گے انہوں نے خوریجی خاتون مظاہرین سے اظہار یکجہتی کرتے ہوئے کہاکہ میں آپ کے ساتھ کاندھا سے کاندھا ملاکر چلنے آیا ہوں اور میں بھی کوئی پیپر اور کاغذ نہیں دکھاؤں گا، آپ سے اپیل ہے کہ آپ لوگ بھی کوئی پیر یا کاغذ نہ دکھانے کا فیصلہ کریں۔ انہوں نے کہاکہ خواتین کا مظاہرہ پورے ملک میں جاری ہے اور خواتین ملک اور دستور بچانے کے لئے سڑکوں پر نکل آئی ہیں۔ دنیا کی کوئی طاقت ان کو ناکام نہیں کرسکتیں۔
سماجی کارکن اور ایڈووکیٹ اور سابق کونسلر عشرت جہاں نے بتایا کہ مسٹرہرش مندر کا خوریجی میں خاتون مظاہرین پر اس بات پربھی زور تھا کہ اگر کوئی سرکاری عہدیدار آپ سے دستاویزات یا کاغذات مانگے تو اسے آپ ہرگز نہ دکھائیں۔انہوں نے خواتین کا حوصلہ بڑھاتے ہوئے کہاکہ آپ نے وہ کر دکھایا گیا ہے جس کی امید کسی کو نہیں تھی۔ آپ کو کسی طرح بھی حوصلہ نہیں ہارنا ہے اور اپنے موقف پر قائم رہنا ہے۔ انہوں نے قومی شہریت ترمیمی قانون کو سیاہ اور خلاف آئین قرار دیتے ہوئے کہاکہ شاہین باغ کے بعد خاتون مظاہرین کا جوش و خروش خوریجی میں بھی دیکھنے کو ملتا ہے۔
جاری۔ یو این آئی۔ ع ا۔