نئی دہلی، 10جولائی (یو این ائی) مرکزی وزیر داخلہ امت شاہ نے ایشیا کے سب سے بڑے ’750میگاواٹ ریوا شمسی توانائی پروجیکٹ‘ قوم کے نام وقف کرنے کے لئے وزیراعظم نریندر مودی کا شکریہ ادا کیا ہے۔
مسٹر شاہ نے آج ٹوئٹ کرکے کہاکہ یہ ایک دوراندیشانہ اور اہم پروجیکٹ ہے جو مودی حکومت کے’آتم نربھر بھارت‘ ویزن کو مضبوطی فراہم کرتا ہے۔ ساتھ ہی یہ پروجیکٹ 2022تک 175گیگاواٹ قابل تجدید توانائی کی صلاحیت کے حاصل کرنے کے مودی حکومت کے عزم کو بھی ظاہر کرتا ہے۔
انہوں نے کہا کہ اس پروجیکٹ کا شروع ہونا ملک کو توانائی شعبہ میں خودانحصار بنانے کی سمت میں ایک اور اہم قدم ہے۔ مسٹر مودی نے نومبر 2015میں پیرس میں منعقدہ اقوام متحدہ موسمیاتی تبدیلی کانفرنس کے 21ویں اجلاس میں ’انٹرنیشنل سولر الائنس‘ کی شروعات کی تھی۔
یو این آئی۔ م ع۔ 1725