NationalPosted at: Sep 18 2020 10:54PM آکسیجن سپلائی کرنے والی گاڑیوں پر پابندی نہیں: وزارت داخلہ
نئی ہلی، 18 ستمبر (یو این آئی) کورونا وبا کے بڑھتے اثر کی وجہ سے کچھ ریاستوں کی جانب سے دوسری ریاستوں میں میڈیکل آکسیجن کی فراہمی میں خلل ڈالنے کی کوششوں کا نوٹس لیتے ہوئے وزارت داخلہ نے کہا ہے کہ میڈیکل آکسیجن صحت کے لئے ضروری عنصر ہے اور اس کی بلا تعطل فراہمی پر پابندی عائد نہیں کی جاسکتی ہے۔
مرکزی داخلہ سکریٹری نے آج ریاستوں اور مرکز کے زیر انتظام علاقوں کے چیف سیکرٹریوں کو خط لکھا ہے اور کہا ہے کہ ملک بھر میں کورونا وبا کے بڑھتے ہوئے قہر کے پیش نظر اس کے علاج کے لئے تمام ریاستوں کو میڈیکل آکسیجن سپلائی ضروری ہے۔ انہوں نے کہا ہے کہ آنے والے وقت میں آکسیجن کی مانگ میں مزید اضافہ ہوسکتا ہے۔
انہوں نے کہا کہ وزارت کو پتہ چلا ہے کہ کچھ ریاستیں مختلف قواعد و ضوابط کا حوالہ دے کر یہاں تیار کی جارہی میڈیکل آکسیجن کی دوسری ریاستوں میں سپلائی میں رکاوٹ ڈال رہی ہیں۔ انہیں زور دیکر کہا کہ میڈیکل آکسیجن صحت کے لئے کافی ضروری ہے اور یہ کورونا انفیکشن والے لوگوں کے علاج کے لئے انتہائی ضروری ہے۔
انہوں نے کہا کہ اس بات کو ذہن میں رکھتے ہوئے تمام ریاستوں کو یہ یقینی بنانا ہوگا کہ میڈیکل آکسیجن کی ایک ریاست سے دوسری ریاست میں سپلائی میں کسی طرح کی رکاوٹ نہ آئے۔ آکسیجن سپلائی کرنے والی گاڑیوں کو ایک ریاست سے دوسری ریاست میں جانے سے نہیں روکا جانا چاہئے۔ ان ریاستوں کو آکسیجن کی سپلائی صرف اپنے سرکاری اسپتالوں تک محدود کرنے سے باز رہنا چاہئے۔ اس طرح کی گاڑیاں بغیر اجازت کے کسی بھی وقت ایک ریاست سے دوسری ریاست جاسکتی ہیں۔
مرکزی داخلہ سکریٹری نے تمام ریاستوں سے کہا ہے کہ وہ اپنے یہاں آکسیجن کی دستیابی یقینی بنانے کے لئے خصوصی ٹیمیں تشکیل دیں۔ ریاستوں سے کہا گیا ہے کہ وہ اس معاملے میں کسی بھی طرح کے مسئلے کے حل کے لئے مرکزی وزارت صحت کے ذریعہ قائم کیے گئے کنٹرول روموں سے رابطہ کرسکتے ہیں۔
انہوں نے تمام ریاستوں سے اس سلسلے میں کارروائی رپورٹ وزارت داخلہ کو بھجوانےکے لئے کہا ہے۔
یو این آئی۔ این یو۔