NationalPosted at: May 16 2022 7:34PM مودی منگل کو ٹیلی کام ریگولیٹر ٹرائی کی سلور جوبلی تقریب سے خطاب کریں گے
نئی دہلی، 16 مئی (یو این آئی) وزیر اعظم نریندر مودی منگل کو ٹیلی کام ریگولیٹری اتھارٹی آف انڈیا (ٹرائی) کی سلور جوبلی تقریب سے خطاب کریں گے اور 5G ٹیکنالوجی کی آزمائشی سہولت کا افتتاح کریں گے۔
وزیر اعظم کے دفتر کے ایک بیان میں کہا گیا ہے کہ مسٹر مودی ویڈیو کانفرنسنگ کے ذریعہ تقریب سے خطاب کریں گے اور ٹرائی کی سلور جوبلی کے موقع پر ڈاک ٹکٹ جاری کریں گے۔
بیان کے مطابق مسٹر مودی '5 جی ٹیسٹ بیڈ' کی سہولت کی نقاب کشائی کریں گے جسے انڈین انسٹی ٹیوٹ آف ٹیکنالوجی (آئی آئی ٹی) مدراس کی قیادت میں کل ملاکر آٹھ اداروں نے ایک مشترکہ پروجیکٹ کے تحت تیار کیا ہے۔ یہ سہولت ملک میں ایک معاون ماحولیاتی نظام فراہم کرے گی تاکہ خطے میں ہندوستانی صنعتی اکائیوں اور اسٹارٹ اپ انٹرپرائزز کو ان کی 5G اور اگلی نسل کی ٹیکنالوجی مصنوعات، ماڈل، حل اور الگورتھم کی توثیق کرنے میں مدد ملے۔5G ٹیسٹ بیڈ، 5G کی ترقی میں آئی آئی ٹی دہلی، حیدرآباد، بمبئی، اور کانپور، انڈین انسٹی ٹیوٹ آف سائنس، بنگلور، اپلائیڈ مائیکرو ویو الیکٹرانکس انجینئرنگ اینڈ ریسرچ (ایس اے ایم ای ای آر) اور سینٹر فار ایکسیلنس ان وائرلیس ٹیکنالوجی (ایس ای وی آئی ٹی) نے تعاون کیا ہے۔
خیل رہے کہ ہندوستان میں ٹیلی کام سیکٹر میں نجی کمپنیوں کے داخلے کے بعد ٹیلی کام مارکیٹ کو ریگولیٹ کرنے کے لیے ٹیلی کام ریگولیٹری اتھارٹی آف انڈیا ایکٹ 1997 کے تحت ٹرائی کا قیام عمل میں آیا تھا۔
یواین آئی۔ م ع۔ 1755