NationalPosted at: Nov 25 2022 4:52PM آئندہ ایک سال میں ابوالفضل انکلیو اور شاہین باغ کے ہر گھر میں پانی کاکنکشن ہوگا : واجد خان
نئی دہلی، 25 نومبر (یو این آئی) دہلی میونسپل کارپوریشن کے انتخابات جیسے جیسے قریب آتے جارہے ہیں، انتخابی مہم کے درجہ حرارت میں اتنی شدت آتی جارہی ہے پوری دہلی کی طرح جامعہ نگر اوکھلا کے وارڈ نمبر 188اور 189 میں بھی تمام سیاسی پارٹیوں کے امیدواروں نے انتخابی جیت کو اپنے حق میں کرنے کے لئے اپنی ساری طاقت جھونک دی ہے اور ہر امیدوار کے حامی اپنے اپنے امیدوار کی حمایت میں نکڑ میٹنگیں کر رہے ہیں۔اس دوران عوام موجودہ کونسلروں سے اقتدر میں رہتے ہوئے ان کے گزشتہ پانچ برسوں کے کام کاج کا بھی حساب مانگ رہے ہیں۔
وارڈ نمبر 188(ابوالفضل انکلیو، شاہین باغ ) کے موجودہ کونسلر اور عام آدمی پارٹی کے امیدوار عبدالواجد خان کے حامی بھی ان کے حق میں سرگرم انتخابی مہم چلارہے ہیں۔ کل انہوں نے ابوالفضل انکلیو اور شاہین باغ میں کئی نکڑ میٹنگیں کیں، جس کے دوران عوام نے ان سے گزشتہ پانچ برسوں کے کام کاج کا حساب بھی مانگا۔
نوجوان سماجی کارکن محمد رفیع نے پینے کے لئے سپلائی کا صاف پانی کی فراہمی کا سوال اٹھایا، جس کے جواب میں انہوں نے وعدہ کیا کہ آئندہ ایک برس میں وارڈ نمبر 188 کے ہرگھر میں سپلائی کے پانی کی فراہمی کو یقینی بنایا جائے گا۔ انہوں نے دعوی کیا ایم سی ڈی انتخابات کے بعد کارپوریشن میں عام آدمی پارٹی کے اقتدار میں آتے ہی پانی کی سپلائی کا کام ترجیحی بنیاد پر شروع کردیا جائے گا، جس کے لئے پائپ بچھانے کا کام پہلے کی تقریباً مکمل کیا جاچکا ہے۔
سوشل ورکر مسٹر شکیل احمد نے ابوالفضل اور شاہین باغ میں کوڑا ڈالنے کے لئے ٹھوس انتظام کرنے اور کوڑاگھر بنانے سے متعلق اہم سوال اٹھایا ۔ مسٹر واجد خان نے کہا کہ یہ علاقے کا سنگین مسئلہ ہے، جو وارڈ نمبر 188 کے آس پاس یوپی آبپاشی کے محکمے کی زمین ہونے کی وجہ سے ہے، جس کے حل کے لئے کیجریوال حکومت سنجیدہ ہے۔ انتخابات کے بعد دہلی میں کوڑے کے تین پہاڑوں کے ساتھ ساتھ اس سمت میں بھی ٹھوس اقدامات کئے جائیں گے، خاص طورپر الشفا اسپتال کے سامنے اور ٹھوکرنمبر آٹھ پر کوڑے کے درپیش سنگین مسئلے کو حل کیا جائے گا تاکہ علاقے کے عوام کو کوڑے کی بدبو اور سڑکوں پر بکھرے ہوئے کوڑے کے سبب سڑک جام سے نجات دلائی جاسکے۔
ماہر تعلیم مسٹر نہال الدین صدیقی نے علاقے کی صفائی ستھرائی کے لئے کارپوریشن کے عملے کی دستیابی اور سیورلائن ڈالنے اور گلیاں بنانے میں ہونے والی تاخیر کے سبب عوام کو درپیش پریشانی کا بھی معاملہ اٹھایا ۔عام آدمی پارٹی کے امیدوار واجد خان نے ان تمام مسائل کے حل کی یقین دہانی کے ساتھ لوگوں سے ووٹ ڈالنےکی اپیل کی۔
تمام گلے شکوے کے درمیان لوگوں کی بڑی تعداد نے وارڈ نمبر 188 میں آپ کے کونسلر امیدوار واجد خان کی حمایت کرنے کی یقین دہانی کرائی۔
میٹنگ کے اہم شرکا میں مسٹر سمیر خان، محمد شکیل، محمد ایاز، پرویز خان،عرفان ملک، ماسٹر مشیر، ایڈووکیٹ سیفی،سہیل خان، اکرم بھائی ، سہیل احمد اور دیگر اہم شخصیات شامل تھیں۔
وارڈ نمبر 188 سے کانگریس کی امیدوار عریبہ خان، بھارتیہ جنتا پارٹی (بی جے پی) کے امیدوار چرن سنگھ، مجلس اتحادالمسلمین کے امیدوار محمد عارف اور سماج وادی پارٹی کے امیدوار آشو خان جبکہ وارڈ نمبر 189 (ذاکر نگر بٹلہ ہاوس ) سے کانگریس کی امیدوار نازیہ دانش ، بی جے پی کی امیدوار لتا چوہان اور عام آادمی پارٹی (آپ ) کی امیدوار سلمی خان اپنے اپنے وارڈمیں عوام کی رائے اپنے حق میں کرنے کے لئے پرزور محنت کر رہے ہیں ۔
یو این آئی۔ ع خ ۔