NationalPosted at: Mar 18 2023 6:35PM ملک بھر کے 200 سے زائد اضلاع میں روزگار میلے کا انعقاد
نئی دہلی، 18 مارچ (یو این آئی) حکومت ملک بھر کے 200 سے زیادہ اضلاع میں 20 مارچ کو پردھان منتری نیشنل اپرنٹس شپ میلے کا انعقاد کرے گی، جس میں بڑے پیمانے پر بے روزگار نوجوانوں کو روزگار فراہم کیا جائے گا۔
وزیر اعظم نریندر مودی کے اسکل انڈیا مشن کے تحت ہندوستان کے نوجوانوں کے لیے کیریئر کے مواقع کو فروغ دینے کے وژن کے مطابق، ہنر مندی کے فروغ اور صنعت کاری کی وزارت (ایم ایس ڈی ای) ملک بھر کے 200 سے زائد اضلاع میں20 مارچ کو پردھان منتری نیشنل اپرنٹس شپ (پی ایم این اے ایم) کا انعقاد کرے گی۔
کئی مقامی کاروباری اداروں اور تنظیموں کو اس اپرنٹس شپ میلے کا حصہ بننے کے لیے مدعو کیا گیا ہے تاکہ مقامی نوجوانوں کو متعلقہ اپرنٹس شپ ٹریننگ کے مواقع فراہم کیے جا سکیں۔یہ انعقاد مختلف شعبوں کی نمائندگی کرنے والی متعدد کمپنیوں کی شراکت داری کا گواہ بنے گا۔ ایک ہی پلیٹ فارم کے ذریعے، حصہ لینے والی تنظیمیں ممکنہ ٹرینیز سے رابطہ قائم کر سکتی ہیں اور موقع پر ہی اپنی ضروریات کو پورا کرنے والوں کا انتخاب کر سکتی ہیں۔
امیدواروں کو اپنے ریزیومے کی تین کاپیاں، سبھی مارک شیٹس اور سرٹیفکیٹس کی تین کاپیاں، تصویری شناختی کارڈ(آدھار کارڈ/ڈرائیونگ لائسنس وغیرہ) اور تین پاسپورٹ سائز کی تصاویر متعلقہ مقامات پر لے جانے ہوں گے ، جو لوگ پہلے ہی اندراج کر چکے ہیں ان سے درخواست کی جاتی ہے کہ وہ تمام متعلقہ دستاویزات کے ساتھ مقام پر پہنچ جائیں۔ اس میلے کے ذریعے امیدوار نیشنل کونسل فار ووکیشنل ایجوکیشن اینڈ ٹریننگ (این سی وی ای ٹی) سے تسلیم شدہ سرٹیفیکیشن بھی حاصل کریں گے جو تربیتی سیشن کے بعد ان کی ملازمت کی شرح کو بہتر بنائے گا۔
وزیر اعظم کے نیشنل اپرنٹس شپ میلے پر اپنے خیالات کا اظہار کرتے ہوئے، ہنر مندی کے فروغ اور صنعت کاری کی وزارت کے سکریٹری اتل کمار تیواری نے کہا، " اپرنٹس شپ کام کی تبدیلی کا بہترین ذریعہ ہے۔ نیشنل اپرنٹس شپ پروموشن اسکیم (این اے پی ایس) کے تحت ڈائریکٹ بینیفٹ ٹرانسفر (ڈی بی ٹی) کے آغاز کے ساتھ آنے والے برسوں میں اپرنٹس شپ ٹریننگ کو مزید فروغ ملے گا۔
یواین آئی۔ م س