OthersPosted at: May 19 2019 1:00PM پنجی ضمنی انتخاب، 11 بجے تک 31.48 فیصد پولنگ
پنجی ، 19 مئی ( یواین آئی) گوا میں پنجی اسمبلی کے ضمنی انتخاب کے لئے اتوار کو پولنگ پرامن طریقے سے جاری ہے اور صبح 11.00 بجے تک 31.48 فیصد ووٹروں نے اپنے ووٹ کے حق کا استعمال کیا ۔ ریاستی الیکشن دفتر کے افسروں نے بتایا کہ پنجی حلقہ میں کل ووٹروں کی تعداد 22،482 ہے، جن میں سے 10،697 مرد اور 11،785 خواتین ووٹر شامل ہیں۔ ان میں 476 نئے ووٹر ہے جو پہلی مرتبہ ووٹ کے حق کا استعمال کریں گے۔انہوں نے بتایا کہ پنجی حلقہ میں 30 پولنگ مراکز قائم کئے گئے ہیں۔ ضلع انتظامیہ نے پرامن پولنگ کو یقینی بنانے کے لئے سکیورٹی کے پختہ انتظامات کئے ہیں۔ سکیورٹی کے لئے سنٹرل انڈسٹریل سکیورٹی فورس (سی آئی ایس ایف) کی بھی تعیناتی کی گئی ہے۔
ضمنی انتخاب میں کل چھ امیدوار انتخاب لڑ رہے ہیں، جن میں سدھارتھ (بی جے پی)، اٹانسو مونسیریٹ (کانگریس)، والمكي نائک (عام آدمی پارٹی) اور سبھارش ویلنگر (گوا سرکشا منچ ) شامل ہیں۔ اس کے علاوہ دو آزاد امیدوار دلیپ گھاڑي اور ونے مورے بھی انتخابی میدان میں ہیں۔ووٹوں کی گنتی 23 مئی کو ہوگی۔
سابق وزیر اعلی منوہر پاریکر کے انتقال کے بعد پنجی اسمبلی سیٹ خالی ہونے کی وجہ سے یہاں ضمنی انتخابات کرائے جا رہے ہیں۔ دو دہائی سے بھی زیادہ وقت تک پنجی حلقہ کی نمائندگی کر چکے مسٹر پاریکر کا گذشتہ 17 مارچ کو انتقال ہو گیا تھا۔
یواین آئی ۔ ک ج